ملی ٹنسی چھےٚ ترقی ہٕنٛز سارِوٕے کھۄتہٕ بٔڈ دُشمن۔ علم، ترقی تہٕ انسانیتٕچ خدمت چُھ حقیقی جہاد: لیفٹیننٹ گورنر

جموں و کشمیرٕکۍ لیفٹیننٹ گورنر منوج سنہاہَن ووٚن برٛٮ۪سوارِ دۄہ زِ ملی ٹنسی چھےٚ ترقی تہٕ انسٲنی فلاح و بہبودٕچ سارِوٕے کھۄتہٕ بٔڈ دُشمن، تہٕ اگر نہٕ معاشرٕ ملی ٹنسی ہٕنٛدٮ۪ن حٲمیَن تہٕ تِہنٛدِس نظرِیَس خٕلاف یِکہٕ وٹہٕ تہٕ آواز تُلہِ تیٚلہِ چھُنہٕ ترقی تہٕ امن مُمکِن۔
یہِ بیان دِیُت تٔمۍ جموں یونیورسٹی منٛز أکِس خصوٗصی کانووکیشنَس خٕطاب کٔرِتھ، یَتھ منٛز تٔمۍ نوجوانَن، وۅستادَن تہٕ معزز شہریَن سۭتۍ کتھ کٔرِتھ ووٚن زِ ملی ٹنسی ختم کرٕنۍ چھِنہٕ صرف سیکورٹی فورسَن ہٕنٛز ذِمہٕ وٲری بلکہِ معاشرٕک پرٮ۪تھ طبقہٕ گژھِ اَتھ خطرَس خلاف کھڑا گژھُن۔
پنٛنِس تقریرَس دوران کوٚر لیفٹیننٹ گورنرَن لال قِلعہٕ دِلہِ دھماکَس منٛز مارٕ گٔمٕتٮ۪ن خراج تحسین تہٕ تِہنٛدٮ۪ن عیالَن سۭتۍ دِلہٕ تعزیتُک اِظہار۔ تٔمۍ ووٚن زِ اسہِ سارِنٕے پزِ اَمہِ سانحہٕ نِش ہیٚچھُن زِ ملی ٹنسی چھےٚ انسانیتٕچ دُشمن، اَتھ چھُنہٕ کانٛہہ مذہب، تہٕ انسانیتُک اتحاد چھُ اَمیُک سارِوٕے کھۄتہٕ بوٚڑ ردعمل۔
گورنر منوج سنہاہَن ووٚن زِ ملی ٹنسی سۭتۍ چھُ جموں و کشمیر کٮ۪و لُکو ساروٕے کھۄتہٕ زِیٛادٕ نۄقصان تُلمُت۔