سری سری روی شنکرن کوٚر سرینگرَس منٛز میر واعظ عمر فاروقَس سۭتۍ مُلاقات۔

آرٹ آف لیونگ فاؤنڈیشنُک بٲنی تہٕ مشہوٗر روحٲنی پیشوا سری سری روی شنکرَن کوٚر برٛٮ۪سوارِ دۄہ یَیٚتہِ میر واعظ عمر فاروقَس سۭتۍ تٔمۍ سٕنٛزِ رہٲیشی جایہِ پٮ۪ٹھ ملاقات۔
ملاقاتس دوران کوٚر دۄشوٕیو رہنُماہو امن، ہم آہنگی، ہمدردی تہٕ بین المذاہب کتھ باتھہِ ہٕنٛدِس اہمیتَس پٮ۪ٹھ تبودلہٕ خیال۔
میر واعظ سٕنٛدِ دفتر طرفہٕ جٲری کَرنہٕ آمتِس أکِس بیانَس منٛز آو ونٛنہٕ زِ سَتو ؤریَو پتہٕ وادی ہُنٛد دورٕ کٔرِتھ کوٚر سری سری روی شنکرَن کٔشیٖرِ یِنس پٮ۪ٹھ خوشی ہُنٛد اِظہار تہٕ دِژٕن یہِ بقائے باہمی ، روٗحٲنی ورثہٕ تہٕ ثقافتی ہم آہنگی ہٕنٛز علامت قرار۔
بیانَس مُطٲبِق: ‘تٔمِس خٲر مقدم کٔرِتھ ووٚن میر واعظن زِ یہِ چُھ ہمیشہٕ امن، کتھ باتھ تہٕ انسٲنی مسلہٕ حل کرنُک تہٕ موثر حل ژھانڈنہٕ خٲطرٕ اکھ ذریعہٕ۔
تٔمۍ ووٚن بیٚیہِ زِ ‘دۄشوٕے رہنُما چھِ اَتھ کَتھِ پیٹھ اتفاق کران زِ ناانصافی تہٕ محرومی چھِ انتہا پسندی زنم دِوان، یُس امنَس خٲطرٕ خطرٕ چھُ۔’
بیانَس مُطٲبِق کٔر میر واعظَن وادی منٛز سری سری روی شنکر سٕنٛزِ حالٕے منشیاتَس خٕلاف مُہِمہِ ہٕنٛدۍ تہِ تعریف۔