پرٛتھ کٲشُر چھُنہٕ ملی ٹنٹ آسان۔ صرف کینٛہہ لوٗکھ چھِ امن برباد کران: وزیر اعلیٰ عمر عبداللہ

جموں و کشمیرٕکۍ وزیر اعلیٰ عمر عبداللہ ہَن کٔر لال قِلعَس نزدیٖک دِلہِ منٛز بم دھماکٕچ سخٕت مذمت تہٕ ووٚنُن زِ یہِ واقعہٕ چھُ انسانیت، امن تہٕ بٲے بندتِس پٮ۪ٹھ وحشیانہٕ حملہٕ۔ تٔمۍ ووٚن زِ جموں و کشمیرٕکۍ تمام لُکھ ملی ٹنٹ قرار دِنۍ چھُ غٲر منصفانہٕ، تِکیازِ صرف کینٛہہ گمراہ نفر چھِ ریاستہٕ کِس امنَس نقصان واتناوان۔
عمر عبداللہ ہَن ووٚن برٛٮ۪سوارِ دۄہ صحافیَن سۭتۍ کتھ کران زِ، ‘یہِ دھماکہٕ چھُ انتہٲئی قابل مذمت۔ کانٛہہ تہِ مذہب چھُنہٕ بےٚ گناہ لُکھ مارنُک اجازت دِوان۔ تفتیش گژھہِ سپدٕنۍ، مگر اسہِ پزِ یاد تھاوُن زِ پرٛتھ کٲشُر چھُنہٕ ملی ٹنٹ۔ صرف کینٛہہ نفر چھِ امن تہٕ بٲے بندُت تباہ کران۔’
تٔمۍ ووٚن بیٚیہِ زِ یِتھٮ۪و افسوسناک واقعاتَو پتہٕ ییٚلہِ پرٛتھ کٲشِرِس مُسلمانَس شَک کِنۍ وُچھنہٕ چھُ یِوان، یہِ چھُ نہٕ صرف غٲر منصفانہٕ بلکہِ سمٲجی ہِشر تہِ متٲثِر کران۔