سعودی عربَس منٛز عمرہ زائرین بسہِ ہُنٛد ڈیزل ٹینکرَس سۭتۍ ٹکراو ، 42 زائرین ہلاک ۔

سعودی عربس منٛز أکِس خوفناک حٲدثس منٛز گٔے عمرہ حاجین نِنہٕ واجِنہِ بسہِ ڈیزل ٹینکرَس سۭتۍ ٹاس لگنہٕ کِنۍ 42 حٲجی ہلاک ۔

عرب خبر رساں ایجنسیَو ہٕنٛدیو رپورٹو مُطٲبِق گٔے أکِس خوفناک بس حٲدثس منٛز درجن وادٕ زائرین ہلاک ۔ یہِ بس یَتھ منٛز زِیٛادٕ تَر ہندوستٲنۍ زائرین ٲسی آیہِ ڈیزل ٹینکرَس سۭتۍ ٹکراونہٕ۔ سعودی وقتہٕ مُطٲبِق گوٚو یہِ حٲدِثہٕ رٲژ لگ بگ 11 بجہِ۔ مُبینہٕ پٲٹھۍ اوس بسہِ منٛز سوار زیادٕ تر مُسافِر ہِنٛدُستٲنہِ رِیاست تیٚلنٛگاناہٕکۍ ۔

عرب میڈیا مُطٲبِق ٲسۍ سعودی عربَس منٛز عمرہ خٲطرٕ زائرین ژٔنٛدٕروارِ دۄہ صُبحٲے أکِس بسہِ منٛز مکہ پٮ۪ٹھٕ مدینہ گَژھان ییٚلہِ تِہٕنٛزِ بسہِ آئل ٹینکرَس سۭتۍ ٹاس لوٚگ، ییٚمہِ پتہٕ دۄشوٕنی گاڑٮ۪ن نار لوٚگ۔

رپورٹَو مُطٲبِق چھُ تیٚلنٛگانہ ؤزیٖرِ اعلیٰ ہن بس حٲدِثس پٮ۪ٹھ صدمُک اِظہار کوٚرمُت تہٕ فوری تحقیٖقٕچ منٛگ کٔرمٕژ۔