عمر عبداللہ حکومت چھےٚ تمام وعدٕ پوٗرٕ کرنُک عزم تھاوان: سریندر چودھری

جموں و کشمیرٕکۍ نٲیِب ؤزیٖرِ اعلیٰ سریندر چودھری یَن ووٚن زِ سٮ۪ٹھاہ مُشکِلَو باوجوٗد چھےٚ عمر عبداللہ حکوٗمت مضبوٗط تہٕ چھےٚ پَنٕنۍ تمام وعدٕ پوٗرٕ کرنہٕ خٲطرٕ پرعزم ۔
تٔمۍ ووٚن زِ بی جے پیَن چھُنہٕ پٔتِمٮ۪ن 11 ہَو ؤریَن منٛز جوٚمَس منٛز کانٛہہ کٲم کٔرمٕژ۔
نٲیِب وزیر اعلیٰ ہن کوٚر برٛسوارِ دۄہ ییَتہِ نامہ نگارن سۭتۍ کَتھ باتھ کٔرِتھ یِمن خیالاتن ہُنٛد اظہار۔
تٔمۍ ووٚن: ‘أسۍ چھِ ونان زِ اسہِ پزِ سُہ چیز حٲصِل کرُن یُس اسہِ مستحق چھُ، اسہِ پزِ ریاستُک درجہ واپس حٲصِل کرُن، سٲنی زمین تہٕ نوکری گژِھہ محفوظ روزٕنۍ تاکہ نیبرِم لوٗکھ ہیکن نہٕ تِم نِتھ۔ یِم چھِ سٲنۍ مسلہٕ یِمن متعلق أسۍ کتھ کران چھِ۔’
تٔمۍ ووٚن: ‘عمر عبداللہ حکومتَس چھِ واریاہ مُشکِلاتن ہُنٛد سامنہٕ ، اسہِ چُھ مُشکِلاتن ہُنٛد مُقابلہٕ کرُن مگر توتہِ چھِ أسۍ کھڑا تہٕ یِمَن چیلنجن ہُنٛد مُقابلہٕ کران’۔
چودھری یَن ووٚن: ‘أسہِ کٔر 5 ؤریَن انٛدر پنٕنی وعدٕ پوٗرٕ کرنٕچ کوٗشش’۔