سٲرسٕے مُلکس منٛز کٲشرٮ۪ن شک چہِ نظرِ وُچھنہٕ نِشہِ کٔرِو گُریز: ڈاکٹر فاروق عبداللہ

نیشنل کانفرنس صدر تہٕ سٲبقہٕ وزیر اعلیٰ ڈاکٹر فاروق عبداللہ ہَن کوٚر لال قلعہ دھماکٕچ تحقیقات کِس پس منظرَس منٛز پوٗرٕ مُلکس منٛز کٔشیٖرِ ہٕنٛدٮ۪ن روزن والٮ۪ن، کٲشِر طٲلبہِ عٔلِمَن تہٕ مزوٗرَن منٛز ہُروٕنہِ بے چینی پٮ۪ٹھ سٮ۪ٹھاہ تشویشُک اِظہار تہٕ کٔرٕن مرکٔزی تہٕ رِیاستی حکوٗمَتس اپیل زِ تِم بنٲوِنۍ پرٮ۪تھ سطحَس پٮ۪ٹھ تِہُنٛد تحفظ، وقار تہٕ بُنیٲدی حقوٗق یقینی۔
ڈاکٹر فاروق عبداللہ ہَن ووٚن زِ مُختٔلِف رِیاستَن منٛز یِم واقعہٕ یِمن منٛز کٲشِرنوجوان، روزن وٲلۍ تہٕ طٲلبہِ علم تعلیم حٲصِل کَران، کٲم کران یا کارٕبارَس منٛز شٲمِل چھِ یِ أکِس سٮ۪ٹھاہ افسوسناک تہٕ خطرناک رُجحانَس کُن اِشارٕ کران۔
تٔمۍ ووٚن زِ ‘لال قلعہ دھماکٕچ تفتیش چھےٚ یقیناً ضروری، مگر بےٚ گناہ کٲشِر حراساں کرٕنۍ یا امہِ چہِ شکلہِ منٛز غٲر ضروُری شک ہاوُن چھُ غٲر منصفانہٕ۔ کٲنٛسہِ فردٕ سٕنٛدِ جُرمُک سزا گژھِ نہٕ پوٗرٕ کمیونٹی دِنہٕ یُن۔