دِلہِ دھماکہٕ کیس: کٔشیٖرِ منٛز دَہن جاین پٮ۪ٹھ چھاپہٕ ، ‘وائٹ کالر’ ماڈیولٕچ تلٲشی تیز۔

10 نومبر دۄہ دِلہِ ہٕنٛدِس تٲریٖخی لال قِلعَس نزدیٖک دھماکہٕ کِس تفتیش کِس سلسلَس منٛز ترٛٲوۍ قومی تحقیقاتی ایجنسی (این آئی اے) ژٔنٛدٕروارِ دۄہ صُبحٲے کٔشیٖرِ منٛز تقریباً دَہَن جاین پٮ۪ٹھ اَکی وِزِ چھاپہٕ۔ یِم چھاپہٕ چھِ اتھ حساس معاملَس منٛز وُنیُک تام ساروٕے کھۄتہٕ بٔڈۍ آپریشن ماننہٕ یِوان، ییٚمیُک مقصد دھماکَس پتہٕ سرگرم مُبینہٕ ‘وائٹ کالر’ ماڈیول تہٕ باقی سہولیت کارَن ہٕنٛدۍ ساینسی تہٕ تکنیکی ثبوت جمع کرٕنۍ چھِ۔

ذٔرایعَو وون زِ این آیی اے ہٕکۍ مُختٔلِف ٹیمو کٔر اَز صُبحٲے شوپیان تہٕ پلوامہ کٮ۪ن واریاہَن گامَن منٛز مخصوٗص رہٲیشی مقامَن پٮ۪ٹھ اچانک کاروٲیی ۔ یِمَن اَہَم نفرَن یِمَن گھرَن پٮ۪ٹھ چھاپہٕ آیہِ ترٛاونہٕ تِمَن منٛز چھِ مولوی عرفان احمد واگے، ڈاکٹر عادل، ڈاکٹر مزمل تہٕ عامر رشید شٲمِل۔

ذرایعو مُطٲبِق یِمَن علاقَن منٛز چھاپہٕ جٲری چھِ تِمَن منٛز چھِ شوپیانَس منٛز نادیگم تہٕ کویل، چندگام، ملنگ پورہ، تہٕ پلواماہَس منٛز سمبورا شٲمِل۔