کٔشیٖرِ منٛز أڈجہِ گالن واجنہِ سردی ہٕنٛز شدت ہنا کم ، ییٚمہِ سۭتۍ زوجیلا پاسَس پٮ۪ٹھ ہلکہٕ شیٖن پیٚیو۔

وادی کٔشیٖرِ منٛز رٲژ ہُنٛد درجہٕ حرارت بہتر گژھنہٕ سۭتۍ مِلیوٚو وادی ہٕنٛدٮ۪ن روزَن والٮ۪ن شدید سردی نِش کینٛہہ راحت ۔
أتھۍ دوران آو اِطلاعاتو مُطٲبِق مِنی مرگ تہٕ زوجیلا پاسَس پٮ۪ٹھ ہلکہٕ شیٖن پٮ۪نُک اطلاع۔
کٔشیٖرِ موسمہٕ مُطٲبِق آو رٮ۪تہٕ کالہِ دارالحکوٗمت سرینگرَس منٛز کم از کم درجہٕ حرارت منفی 1.9 ڈگری سیلسیس ریکارڈ کرنہٕ ییٚلہِ زَن راتھ رٲژ ہُنٛد درجہٕ حرارت منفی 4.4 ڈگری سیلسیس آو ریکارڈ کرنہٕ۔
28 نومبر گٔیہِ سرینگرَس منٛز موجودٕ موسمٕچ سارِوٕے کھۄتہٕ سرد رٲژ درٕج، یَتھ منٛز رٲژ ہُنٛد درجہٕ حرارت منفی 4.5 ڈگری سیلسیس اوس۔
وادی ہٕنٛدِس مشہوٗر سیاحتی مُقام پہلگامَس منٛز آو کم از کم درجہٕ حرارت منفی 0.4 ڈگری سیلسیس ریکارڈ کرنہٕ، ییٚلہِ زَن راتھ رٲژ آو منفی 5.6 ڈگری سیلسیس ریکارڈ کرنہٕ۔
بیٚیِس أکِس مشہوٗر سیاحتی مقام، گُلمرگہِ منٛز آو کم از کم درجہٕ حرارت منفی 0.3 ڈگری سیلسیس ریکارڈ کرنہٕ، ییٚلہِ زن راتھ رٲژ منفی 1.4 ڈگری سیلسیس آو ریکارڈ کرنہٕ۔