شیخ محمد عبداللہ سُند مشن برونہہ پکناوُن چھےٚ سٲنۍ ذمہٕ وٲری: آغا روح اللہ مہدی

ممبر پارلیمنٹ آغا روح اللہ مہدیَن ووٚن زِ نیشنل کانفرنسٕکۍ بٲنی شیخ محمد عبداللہ سٕنٛدِس120 زایہِ دۄہ گژھِ جموں و کشمیر کٮ۪ن لوٗکَن ہٕنٛدِ خٲطرٕ انصاف، وقار تہٕ جمہوری حقوق حٲصِل کرنس منٛز تٔمۍ سٕنٛدِ تعاونٕچ یاد دہانی کرُن۔
تٔمۍ ووٚن زِ شیخ صٲب تہٕ تٔمۍ سٕنٛدۍ سٲتھی ٲسۍ سیٲسی ہمت ، لچک تہٕ لوٗکَن ہٕنٛزِ اجتمٲعی خواہشَن ہٕنٛز علامت۔
ممبر پارلیمنٹَن کوٚر جُمعہ دۄہ شیخ محمد عبداللہ سٕنٛدِس 120 ہِمِس زایہِ دۄہس پیٹھ پننِس دفترکِس ‘ایکس’ ہینڈلَس پیٹھ أکِس زیٖٹھِس پوسٹَس منٛز یِمَن خیالَن ہُنٛد اظہار۔
تٔمۍ ووٚن: ‘از ییٚلہِ أسۍ شیخ محمد عبداللہ صٲب سُنٛد 120 ہِم زایہِ دۄہ مناوان چھِ، أسۍ چھِنہٕ صرف تٔمۍ سُنٛد تھدِ سیٲسی قدُک بلکہ انصاف، وقار تہٕ جموں و کشمیر کٮ۪ن لوٗکَن ہٕنٛدٮ۪ن حقوقن خٲطرٕ تٔمۍ سُنٛد اٹل عزم تہِ یاد تھاوان’۔
تِمَو ووٚن زِ شیخ صٲب تہٕ تٔمہِ سٕنٛدۍ سٲتھی ٲسۍ سیٲسی ہمت ، لچک تہٕ لوٗکَن ہٕنٛزِ اِجتمٲعی خواہشَن ہٕنٛز علامت۔
آغا روح اللہ ہَن ووٚن: ‘شیخ عبداللہ صٲبَن کٔر پنٕنۍ زِنٛدٕگی ظُلمَس چیلنج کرنہٕ تہٕ استحصالٕک ڈانٛچہٕ ختم کرنہٕ خٲطرٕ وقف۔