دُبَیی ایکسپورٹ گھوٹالَس منٛز دۄن فرار مُلزِمن خٕلاف چارج شیٹ درٕج: سی بی کے

کرٛایِم برانچ کشمیر (سی بی کے) ہٕکۍ اکنامک کرائمز وِنگَن چھُ دُبَیی ایکسپورٹ گھوٹالہٕ کِس دۄن فرار ملزمن خلاف چارج شیٹ درٕج کٔرمٕژ۔ وِنٛگ ہٕنٛدِ ترجمانَن ووٚن زِ کرٛایِم برانچَن چھُ آر پی سی کِس دفعہٕ 420 تہٕ 120 (بی) تحت درٕج ایف آئی آر نمبر 31/2023 منٛز دۄن مُلزِمن خٕلاف سرینگر عدالتَس منٛز چارج شیٹ درٕج کٔرمٕژ، یَتھ منٛز اکھ عادت مُجرِم زاہد بشیر صوفی عرف شاگو تہِ شٲمِل چھُ، یُس اندرابی کالونی، نارا بالا ہُک روزَن وول بشیر احمد صوفی سُنٛد نیٚچُو چھُ۔ تٔمۍ ووٚن زِ چونکہ دۄشوے مُلزِم چھِ وُنہِ تہِ فرار ، اَمہِ مۄکھٕ آو چارج شیٹ دفعہٕ 512 سی آر پی سی تحت تِہنٛدِس غٲر موجوٗدگی منٛز پیش کرنہٕ۔ تٔمۍ ووٚن بیٚیِہ زِ ‘زاہد بشیر شاگو تہٕ أمۍ سٕنٛز خانٛدارِنۍ شگفتہ چھِ گۄڈَے دھوکہ دہی ہٕنٛدٮ۪ن واریاہَن معاملَن منٛز مُلوث لبنہٕ آمٕتۍ، یِمَن منٛز ایف آئی آر نمبر 21/2022 تہٕ ایف آئی آر نمبر 13/2018 شٲمِل چھِ، دۄشوٕنی ہُنٛد تعلُق چھُ زٕ گیس ایجنسی فراہم کرنہٕ کہِ بہانہٕ مبینہ طور پٲنسہٕ دھوکہٕ دِنُک معاملہٕ’۔ بیانَس منٛز اوسُکھ بیٚیہِ ووٚنمُت زِ گِرِفتٲری نِش بچنہٕ پتہٕ آیہِ یِم معاملہٕ دفعہٕ 512 سی آر پی سی تحت غٲر حٲضِری منٛز پیروی کرنہٕ۔