عدالتی حُکمَس پٮ۪ٹھ پلوامِس منٛز پولیس چھاپہٕ، حساس مواد برآمد ۔

پلوامہس منٛز این آئی اے عدالتہٕ طرفہٕ جٲری کرنہٕ آمٕتۍ سرکٲرۍ تلٲشی وارنٹ پتہٕ ترٛوو جموں و کشمیر پولیسَن بَٹہٕ وارِ دۄہ لیتٕر علاقَس منٛز أکِس دُکانَس پٮ۪ٹھ چھاپہٕ، یَتھ دوران واریاہ چیٖز ضبط کٔرِکھ یِم معاملَس منٛز حساس تہٕ قابل اعتراض ماننہٕ چھِ یِوان۔ یہِ آپریشن آو مجسٹریٹ تہٕ آزاد گواہَن ہٕنٛزِ موجودگی منٛز قونوٗنی طٔریٖقہٕ کارٕچ پوٗرٕ تعمیل کٔرِتھ انجام دِنہٕ۔
پُلسہٕ مُطٲبِق آیہِ یہِ کاروٲیی ایف آئی آر نمبر 24/2024 تحت کرنہٕ، یُس یو اے پی اے کِس دفعہٕ 10 تہٕ 13 ہَس مُتلِق اوس۔ چھاپَس دوران اوسُکھ محمد عامر رادر ناوکِس أکِس شخٕصہٕ سٕنٛدِ دُکانہٕ پٮ۪ٹھٕ جے کے ڈی ایف پی ہٕکۍ پوسٹر تہٕ ممنوعہ ادب برآمد کوٚرمُت، یِم تفصیٖلی تفتیش باپتھ قونوٗنی تحویلَس منٛز نِنہٕ آمٕتۍ چھِ۔
تحقیٖقاتُک دٲیرٕ چھُ ضبط کرنہٕ آمتِس موادَس سۭتۍ وابستہٕ مقصدَن، رٲبطَن تہٕ مُمکِنہٕ نیٹ ورکُک سراغ لگاونہٕ خٲطرٕ بڑاونہٕ یِوان۔ پولیسَن چُھ ووٚنمُت زِ غٲر قونوٗنی سرگرمیَن خٕلاف کاروٲیی منٛز یِیہِ نہٕ کانٛہہ نرمی ہاونہٕ تہٕ امن تہٕ قونوٗن برقرار تھاونہٕ خٲطرٕ روزن سخٕت اِقدامات جٲری۔