باغبانی محکمَن کوٚراز باغبانی ہٕنٛز انٹیگریٹڈ ڈیولپمنٹ (ایم آئی ڈی ایچ) مشنس تحت اکہِ دۄہہٕ کہِ ضِلعی سطحی بیدٲری پروگرامُک انعقاد۔

از کوٚر محکمہٕ باغبانی ضِلعہٕ سرینگرَن ٹائیگور ہالَس منٛز باغبانی ہٕنٛز انٹیگریٹڈ ڈیولپمنٹ (ایم آئی ڈی ایچ) مِشنَس تحت سرینگر کٮ۪ن ترقی پسند زٔمیٖن دارن خٲطرٕ اکہِ دۄہُک ضِلعہٕ سطحی بیدٲری پروگرام منعقد۔ اتھ تقریبہِ منٛز ٲسۍ سرینگرٕکۍ ڈپٹی کمشنر شری اکشے لیبرو مہمان خصوصی۔ پننِس کلیدی خطابس منٛز دِیُت ڈپٹی کمشنرن زٔمیٖن دارن زور زِ تِم تُلِنۍ محکمہٕ باغبانی ہٕنٛدِ طرفہٕ لاگو کرنہٕ آمژن مُختٔلِف ترقیٲتی سکیمَن فٲیدٕ ۔ مرکٔزی تہٕ مرکز کہِ زیر انتظامہٕ دۄشوٕنی حُکوٗمَتن ہُنٛد مقصد چھُ مٮ۪ون ہٕنٛدٮ۪ن فصلَن ہٕنٛز پٲداوار بڑٲوِتھ تہٕ مٮ۪وٕ وۄپداون والٮ۪ن بہتر منافع خٲطرٕ معیٲری فصلہٕ وۄپداونَس قٲبِل بنٲوِتھ زٔمیٖن دارَن ہٕنٛز سمٲجی تہٕ اقتصٲدی حیثیت بہتر بناوٕنۍ۔