پہلگام ملی ٹنٹ حملہٕ کیس: لشکر طیبہ/ٹی آر ایفٕچ پٲکِستان چہِ سرپرستی منٛز سٲزِش بے نقاب۔
نیشنل انویسٹی گیشن ایجنسی (این آئی اے) کٔر پہلگام ملی ٹنٹ حملہٕ کیسَس منٛز أکِس اہم پیش رفتٕکۍ پٲٹھۍ پٲکِستان چہِ سرپرستی منٛز ترتیب دِنہٕ آمٕژ ملی ٹنسی سٲزِش بے نقاب تہٕ کٔرٕن جۅمہِ کِس خصوٗصی این آئی اے عدالتَس منٛز اکھ تَفصیٖلی چارج شیٹ درٕج۔ این آیی اے طرفہٕ دٲخٕل کٔرمٕژ 1,597 صفَن ہٕنٛز چارج شیٹ منٛز چھُ ممنوعہ ملی ٹنٹ تنظیم لشکر طیبہ تہٕ اَمہِ کِس ذیلی شاخَس (ٹی آر ایف) مُلزِم تنظیمَن ہُنٛد ناو دِنہٕ آمُت۔
چارج شیٹ مُطٲبِق اوس پہلگام حملہٕ اکھ منظم تہٕ منصوبہ بند آپریشن ییٚمیُک مقصد مذہبی طور ٹارگیٹ کلنگ تہٕ سیاحتَس نۄقصان واتناونہٕ ذٔریعہٕ جموں و کشمیرَس منٛز خوف پٲدٕ کرُن اوس۔
پننِس تحقیٖقاتَس منٛز چھُ این آیی اے یَن پٲکِستانَس منٛز قٲیِم ملی ٹنٹ ہینڈلر ساجد جاٹ سٕنٛز شناخت کٔرمٕژ زِ أمۍ چھُ سٲزِشہِ منٛز اَہَم کِردار ادا کوٚرمُت تہٕ ییٚمہِ حملُک منصوبہٕ بنٛوٚومُت، مٲلی مدد فراہم کوٚرمُت، تہٕ سرحد اَپارِ پیٹھہٕ ملی ٹنٹن ہِدایَت دِژمٕژ۔ چارج شیٹس منٛز چھِ حملَس منٛز شٲمِل ترٛٮ۪ن پٲکِستٲنۍ ملی ٹنٹن ہُنٛد ناو تہِ شٲمِل۔