جموں و کشمیر بینکَن کوٚر ایف پی اوَن خٲطرٕ ورکشاپ تہٕ صلاحیت سازی ہُنٛد پروگرام منعقد۔
زراعتی شعبَس منٛز ادارٕ جاتی قرضٕکۍ بہاؤ مضبوٗط کرنہٕ چن جٲری کوٗشِشن ہٕنٛدِ حِصہٕ پٲٹھۍ کوٚر جموں و کشمیر بینکَن از پننِس کارپوریٹ ہیڈ کوارٹرَس منٛز فارمرز پروڈیوسر آرگنائزیشنَن (ایف پی اوز) خٲطرٕ کریڈٹ بیدٲری پٲدٕ کرنہٕ خٲطرٕ ورکشاپ تہٕ صلاحیت سازی پروگرامُک اِنتِظام۔
بینکٕکۍ جنرل منیجر (سرکٲرۍ کاروبار)، آشوتوش سریٖنَن کٔر اجلاسٕچ صدارت یُس جنرل منیجر (رِٹیل، ایگریکلچر تہٕ ایم ایس ایم ای) راکیش ماگوترا، ڈی جی ایم انیت کنول سنگھ، ایف پی اوَن ہٕنٛدۍ نُمایندٕ تہٕ بینکٕکۍ باقٕے سینئر افسرَن ہٕنٛز موجودگی منٛز منعقد کرنہٕ آو۔
ورکشاپُک مقصد اوس ایف پی اوز بینکنگ نظام، کریڈٹ سٔہوٗلِیاتن ہٕنٛز دستیٲبی، تہٕ اجتمٲعی کاشتکٲری ادارن خٲطرٕ ڈیزائن کرنہٕ آمٕتۍ ساختی مٲلی اختیارن مُتعلِق حساس بناوُن۔
شِرکَت کَرن والٮ۪ن خٕطاب کٔرِتھ دِیُت جنرل منیجر آشوتوش سریٖنَن زرعی تبدیلی تہٕ گٲمی خۄشحٲلی ہٕنٛدِ اہم محرکَن ہٕنٛدِ پٲٹھۍ ایف پی اوز سٕنٛز مدد کرنہٕ خٲطرٕ بینکٕک عزمَس پٮ۪ٹھ زور۔