گاندربلَس منٛز منشیات خٕلاف کارروائی؛ 2 اسمگلر گِرِفتار، ہیروئِن ہیوٗ مادٕ آو برآمد کرنہٕ

منشیاتَس خٕلاف جٲری مُہِمہِ دوران کٔر گندر بل پولیسَن اکھ اَہَم کاروٲیِی، یَتھ منٛز زٕ ڈرگ باپَر گِرِفتار کٔرِکھ تہٕ تِمَن نِش کٔرٕکھ ہیروئِن ہیوٗ شَکاوَر مادٕ برآمد ۔
پُلسہٕ کِس بیانَس مُطٲبِق رُکٲوۍ ایس ایس پی گندر بل خلیل احمد پسوال سٕنٛزِ ہِدایَتس تحت پُلیٖس تھانہٕ کہِ ٹیٖمَن سینٹرل یوٗنیورسٹی روڈَس پٮ۪ٹھ معموٗل چہِ چیکنگ دوران رجسٹریشن نمبر JK01U-3866 واجنہِ ماروتی گاڑِ تہٕ کٔرٕکھ تلٲشی۔
تلٲشی دوران کٔرِکھ گاڑِ منٛز سوار زٕ نَفر — بشیر احمد بٹ سُنٛد نیٚچُو، تہٕ محمد مظفر بٹ سُنٛد نیٚچُو، سمیر احمد بٹ، بٹ وانی گندر بلٕکۍ روزَن وٲلۍ۔ پُلسہٕ مُطٲبِق چھُ گِرِفتار کرنہٕ آمٕتۍ نفرَن منٛز اکھ ایم بی اے تعلیم حٲصِل کٔرمُت طٲلبہِ عٔلِم ۔
کاروٲیی دوران آو تِہنٛدِس قبضَس منٛز ہیروئِن ہیوٗ ممنوعہ مادٕ برآمد کرنہٕ، یُس قونوٗنی طٔریٖقہٕ کار مُطٲبِق ضبط آو کرنہٕ۔ امہِ واقعہٕ کِس سلسلَس منٛز چھُ ایف آئی آر نمبر 41/2025 این ڈی پی ایس ایکٹ کِس مُتعلقہٕ دفعَن تحت درٕج کرنہٕ آمُت، تہٕ سپلائی چین تہٕ باقٕے سٲتھیَن ہُنٛد پتہ لگاونہٕ خٲطرٕ چھِ مزید تفتیش جٲری