20 جنوری تام چھُنہٕ کٔشیٖرِ منٛز موسمَس منٛز کانٛہہ بٔڑ تبدیلی متوقع

وادی کٔشیٖرِ منٛز کینٛہہ کال شیٖن تہٕ روٗد پیٚنہٕ پتہٕ کوٚر محکمہٕ موسمیاتَن 20 جنوری تام موسمَس منٛز کُنہِ تہِ بٔڑِس پیمانَس پٮ۪ٹھ تبدیٖلی نِش انکار۔ محکمہٕ مُطٲبِق اوس پٔتِمٮ۪ن 24 گھنٹَن دوران سادھنا پاسَس پٮ۪ٹھ 6 آنٛچہِ، گوریز تہٕ تٹاپانی پٮ۪ٹھ 8 پٮ۪ٹھٕ 12 آنچہِ، سونامرگ-زوجی لا ہَس پٮ۪ٹھ 5 پیٹھٕ 8 آنچہِ، گُلمرگَس پٮ۪ٹھ 2 آنٛچہِ، مغل روڈ تہٕ سِنتھن ٹاپس پٮ۪ٹھ 2 پیٹھٕ 4 آنچہِ تہٕ پہلگام کٮ۪ن ہیٚرمٮ۪ن علاقَن منٛز 2 آنچہِ روٗد پیوٚومُت۔ محکمٕکۍ ترجمانَن ووٚن زِ 1 جنوری روزِ موسم اوٚبُر تہٕ کٔشیٖرِ تہٕ جموں صوبہٕ کٮ۪ن پہٲڑی علاقَن منٛز چھِ کُنہِ جایہِ ہلکہٕ شیٖن پیٚنُک امکان۔ تٔمۍ ووٚن زِ 2 پٮ۪ٹھٕ 5 جنؤری تام ہیکہِ موسم عام طور اوٚبُر روزِتھ، تہٕ اَمہِ پتہٕ 6 جنوری چھُ شُمٲلی تہٕ وسطی کشمیر کٮ۪ن پہٲڑی علاقَن منٛز کُنہِ کُنہِ جایہِ ہلکہٕ شیٖن پیٚنہٕ ممکن۔ تٔمۍ ووٚن زِ 7 پٮ۪ٹھٕ 15 جنوری تام ہیکہِ موسم کُنہِ حدس تام اوٚبُر روزِتھ۔ ترجمانَن ووٚن ووٚن زِ 20 جنوری تام چھُنہٕ جموں و کشمیرَس منٛز موسمَس منٛز کانٛہہ بٔڑ تبدیلی ہُنٛد اِمکان۔