جموں و کشمیر: دچھان، کشتواڑَس منٛز خوفناک نار، واریٛاہ گَرٕ گٔیہِ سوٗری.

جموں و کشمیرَس منٛز کِشتواڑ ضِلعہٕ کِس دچھان علاقَس منٛز نار لگنہٕ کِس أکِس خوفناک واقعَس منٛز چھِ واریٛاہ رہٲیشی مکانہٕ سوٗر گٔمٕتۍ۔ ذرایعَو دِژ اطلاع زِ راتس لوٚگ کشتواڑ کِس دچھان علاقَس منٛز أکِس گَرَس منٛز نار، تہٕ اَمیُک نار لوٚگ نکھٕکۍ گَرَن تہٕ لٔکرِ ہِنٛدِس ڈانٛچہٕ لٔگِتھ۔ تِمَو ووٚن زِ اَتھ واقعَس منٛز گٔیہِ واریاہ مکانہٕ تباہ ۔ أتھۍ دوران ووٚن مرکٔزی ؤزیٖر ڈاکٹر جتیندر سنگھَن ‘ایکس’ پٮ۪ٹھ أکِس پوسٹَس منٛز: ‘دچھن علاقَس منٛز نار لگنہٕ کِس واقعَس مُتعلِق زاننہٕ پتہٕ، یَتھ منٛز کینٛہہ مکانہٕ دٔزِمٕتۍ چھِ، مےٚ کٔر وُنی ڈی سی کشتواڑ شری پنکج شرماَس سۭتۍ کَتھ باتھ’۔ تٔمۍ ووٚن زِ اَتھ واقعَس منٛز چھُنہٕ کانٛہہ تہِ جٲنی نۄقصانٕچ اطلاع دِنہٕ آمٕژ۔ تٔمۍ ووٚن بیٚیِہ زِ انتظامیہ تہٕ ریڈ کراسَن چھُ فوری طور جایہِ پٮ۪ٹھ امدادی سامان واتنوومُت، تہٕ مُتٲثِر خاندانَن مالی مددتہٕ خٲطرٕ تہِ چھِ انتظامات کرنہٕ یِوان۔