عمر عبداللہ چھُ مُلکٕک وفٲقی ڈھانٛچہٕ چہِ مضبوطی پٮ۪ٹھ سوال کرنٕچ کوٗشِش کران  تہٕ وادی منٛز بیٚیہِ افراتفری ہُنٛد ماحول پٲدٕ کرُن یژھان: سنیل شرما

جموں و کشمیر اسمبلی منٛز حزب اِختلافٕکۍ رہنُما تہٕ بی جے پی ایم ایل اے سنیل شرماَن دِیُت وزیر اعلیٰ عمر عبداللہ سٕنٛدِ یوم آزٲدی ہُنٛد تقریر ‘غٲر ذِمہٕ دار’ قرار، تہٕ کوٚرُن وزیر اعلیٰ پٮ۪ٹھ پنِنہِ خطابہٕ ذٔریعہٕ وادی منٛز ‘پریشٲنی ہُنٛد ماحول’ پٲدٕ کرنٕچ کوٗشش کرنُک اِلزام عٲیِد۔ سرینگر کِس بخشی سٹیڈیمَس منٛز مُنعقد 80 ہِمہِ یوم آزٲدی ہٕنٛزِ مرکٔزی تقریٖبہِ دوران وزیر اعلیٰ سٕنٛدِس تقریرَس پٮ۪ٹھ ردِعمل دِوان ووٚن سنیل شرماَن زِ یومہِ آزٲدی ہُنٛد پلیٹ فارم چھُنہٕ سیٲسی بیانَن خٲطرٕ بلکہِ چھُ مُلکٕچ اتحاد، سالمیت تہٕ خۅدمختٲری خٲطرٕ عزم ظٲہِر کرنُک موقعہٕ۔ تٔمۍ ووٚن زِ وزیر اعلیٰ سُنٛدتقریر اوس تٔمِس افسوسناک تہٕ غٲر ذِمہٕ دارانہٕ باسان۔ تٔمۍ سندِ مُطٲبِق گژھہِ اتھ موقعس پیٹھ ملکٕچ یکجہتی تہٕ سالمیت، فوجی اہلکارن تہٕ شہیدَن ہٕنٛزِ قربٲنی تہٕ قومی جھنڈٕکِس احترام تہٕ وٮ۪قارس مُتعلِق کتھ کرنہٕ یِنۍ۔