جموں و کشمیر اسمبلی منٛز آز ریاستی حیثیت بحال کرنہٕ کِس قراردادَس پٮ۪ٹھ بیٚیہِ ہنگامہٕ، بی جے پی پارٹی کوٚر واک آؤٹ۔

حزب اِختِلاف بھارتیہ جنتا پارٹی کوٚر آز بیٚیہِ جموں و کشمیر اسمبلی منٛزٕ ریاستُک درجہٕ بحال کرنہٕ کِس قرارداد چہِ منظوٗری خٕلاف ہنگامہٕ برپا۔ یہِ قرارداد ٲس راتھ اسمبلی منٛز نیشنل کانفرنس کِس قیادتَس منٛز حکوٗمتَن منظور کٔرمٕژ۔

اسمبلی ہُنٛد اجلاس شُروٗع سپدنس سٍتی کوٚربی جے پی یَن سپیکر ہٹاونٕچ منٛگ، یہِ ؤنِتھ زِ اسمبلی منٛز منظور کرنہٕ آمٕژ قرارداد چھےٚ غٲر آئینی تہٕ غٲر قونوٗنی۔ حزب اِختلافُک رہنُما سنیل شرما ووتھ حزب اِختلاف کٮ۪و بینچَو پٮ۪ٹھٕ تہٕ کٔرٕن سپیکر سٕنٛدِ استعفٕچ منٛگ۔ تٔمۍ کوٚر الزام عٲیِد زِ سپیکرَن دِیُت راتھ ایوانَس منٛز ‘اکھ غٲر قونوٗنی تہٕ غٲر ٲیینی’ قرارداد منظور کرنُک اجازت۔

بی جے پی یَن کٔر نیشنل کانفرنسہٕ کِس قیادتس منٛز حکوٗمت طرفہٕ منظور کرنہٕ آمٕژ قراردادٕچ مُخٲلِفت، یَتھ منٛز یہِ الزام لگاونہٕ آو زِ یہِ چھُ جموں و کشمیرٕچ حیثیت تہٕ خۄد مۄختٲری بحال کرنٕچ کتھ کران یِتھ زن یہِ 1953 برٛونٛہہ اوس۔

أتھۍ دوران دِیُت سپیکرن حزب اِختلاف کٮ۪ن رُکنَن ہِدایَت زِ تِم دِن ایوانٕچ کاروٲیی معموٗل پٲٹھۍ جٲرِی روزنہٕ ییٚمہِ پتہٕ بی جے پی پارٹی ہٕنٛدٮ۪و رُکنو ایوانہٕ منٛزٕواک آؤٹ کوٚر۔