جموں و کشمیر اسمبلی منٛز مُبینہٕ ‘جل جیون مِشن’ گھوٹالس پٮ۪ٹھ دُبارٕہ بحث۔

ازآوجموں و کشمیر قونوٗن ساز اسمبلی منٛز ‘جل جیون مِشن’ گھوٹالس مُتعلِق ہاؤس کمیٹی (پارلِمنٹری کٔمیٖٹی) ہٕنٛدِس رِپورٹَس پیٹھ بَحَث کرنہٕ یُس اجلاسٕکہِ گۄڈٕنِکہِ دۄہ اسمبلی منٛز پیش کرنہٕ آمُت اوس۔ وزیر اعلیٰ عمر عبداللہ، یُس ایوانُک رہنُما چھُ، کَرِ 2023 تہٕ 2024 ؤرۍ یَن خٲطرٕ ہندوستانٕکۍ کمپٹرولر اینڈ آڈیٹر جنرل (سی اے جی) سٕنٛز رپورٹ ایوانَس برٛونٛہہ کنہِ پیش۔ قونوٗن سٲزی ہٕنٛدِ طرفہٕ جٲری کرنہٕ آمٕتۍ ایجنڈا (کاربٲری فہرست) مُطٲبِق دِیُت جسٹس (ریٹائرڈ) حسنین مسعودی جموں و کشمیر مرکزی زیر انتظام علاقس منٛز جل جیون مشن (جے جے ایم) کِس نفاذَس منٛز مبینہٕ بے ضابطگی ہٕنٛز تفتیش خٲطرٕ بناونہٕ آمٕژ ہاؤس کمیٹی ہٕنٛدِس رِپورٹَس پٮ۪ٹھ اکھ مختصر بیان۔ حسنین مسعودی اوس امہِ کمیٹی ہُنٛد صدر، یٔمۍ جل جیون مِشنَس منٛز مبینہ بے ضابطگین ہٕنٛز چھان بین کٔر تہٕ وُچھُکھ زِ آبٕچ فراہمی ہٕنٛزِ سکیمہٕ چھِ زٔمیٖنَس پٮ۪ٹھ غٲب، ییٚلہِ زَن سرکٲرۍ ریکارڈَن منٛز چھِ یِم موٗجوٗد ہاونہٕ آمژٕ۔ کمیٹی چھُ حکوٗمتَس مشورٕ دِیُتمُت زِ سُہ کَرِ یِمَن مُبینہٕ بے قاعدگین ہٕنٛز مزید تَفصیٖلی تفتیش خٲطرٕ اکھ اعلیٰ سطحی کمیٹی تشکیل دِنُک مشورٕ۔