اننت ناگَس منٛز75 کِلو چرٕس پاؤڈر ضبط ، 2 نَفر گِرِفتار
بٔڑِس مقدارَس منٛز نشاور ادوِیات ژوٗرِ تھاونس مُتعلِق معلوٗماتن ہٕنٛدِس بُنیادَس پٮ۪ٹھ آیہِ مٹن پُلسہٕ تھانس منٛز زٕ الگ الگ مقدمہٕ درٕج کرنہٕ۔ جنوٗبی کشمیر کِس اننت ناگ ضِلعَس منٛز جٲری منشیاتن خٕلاف کاروٲیی تحت کٔر پولیسَن سونچ بارہ علاقَس منٛز دۄن الگ الگ رہٲیشی گھرَن تلٲشی تہٕ کوٚرُکھ کُل 75 کِلوگرام چرٕس ضبط تہٕ 2 نَفر گِرِفتار۔ پُلسہٕ مُطٲبِق سپٕز سونچ بارہ علاقَس منٛز بٔڑِس مقدارَس منٛز نشاور ادوِیات ژوٗرِ تھاونس مُتعلِق تصدیٖق شُدٕ زانکٲری حٲصِل ، ییٚمہِ کِنہِ مٹن پُلسہٕ تھانس منٛز زٕ الگ الگ مقدمہٕ درٕج سپٕدۍ۔ اَتھ سلسلَس منٛز ٲسِکھ محمد حنیف خان سٕنٛدِس نیچو مدثر احمد خان تہٕ سیف اللہ خان سٕنٛدِس نیچو عبدالقیوم خانَس خٕلاف ایف آئی آر نمبر 108/2026 تہٕ 109/2026 درٕج کٔرمٕتۍ، یِم دۄشوَے چھِ سونچ بارہ کِس روزَن وٲلۍ۔ پولیسَن ووٚن زِ ضروٗری قونوٗنی رسم پوٗرٕ کرنہٕ تہٕ مجاز حٲکِمَن نِش تلاشی ہُنٛد حُکُم حٲصِل کرنہٕ پتہٕ آیہِ دۄشوٕنی نفرَن ہِنٛدٮ۪ن رہٲیشی گھرَن ہٕنٛز تلٲشی تہِ کرنہ۔