ریاستی قراردادس پیٹھ ووٚتھ بیوروکریٹن ہٕنٛدین چِٹھٮ۪ن ہُنٛد معاملہٕ،وحید پرہ سٕنٛدِ طرفہٕ”موشن آف پریولیج” پیش۔
جموں و کشمیر اسمبلی منٛزچھےٚ حزب اِختلاف پارٹی ہٕنٛدۍ أکۍ رُکنَن چیف سیکرٹریس تہٕ لا سیکریٹریس خٕلاف مراعات تحریک پیش کٔرمٕژ۔ یہِ کاروٲیی آیہِ تَمہِ وِزِ برونہہ کُن ییٚلہِ دۄشوٕے افسرَو سپیکرَس لیٚکھِتھ وزیر اعلیٰ عمر عبداللہ سٕنٛدِس ‘ریاستُک درجہٕ بحال کرنہٕ کِس قراردادَس’ پٮ۪ٹھ بَحَث نہ کرنُک درخواست کٔر۔ یہِ قرارداد آیہِ جُمعہ دۄہ پیش کرنہٕ تہٕ بی جے پی مخٲلفژ باوجوٗد آیہِ ژٔنٛدٕروارِ دۄہ آیس اسمبلی منٛز تقریباً تمام غٲر بی جے پی جماعتن تہٕ آزاد ارکانَن ہٕنٛدِ حمایتہٕ سۭتۍ منظوٗری دِنہٕ۔
پلوامہ پٮ۪ٹھٕ منتخب کرنہٕ آمٕتۍ پی ڈی پی ایم ایل اے وحید الرحمن پرہن کوٚر اسمبلی بجٹ اجلاس کہِ ٲخری دۄہ سپیکر عبدالرحیم راتھرَس برٛونٛہہ کنہِ "موشن آف پریولیج” پیش۔یُس انتظٲمی بیوروکریسی درمیان ٲیینی اختیارات تقسیم کرنس پٮ۪ٹھ اکھ سنگین سوال تُلان چُھ۔