مرکز چھُنہٕ جموں و کشمیرُک ریاستی درجہ بحال کرنَس مُتعلِق سنجیدٕ: فاروق عبداللہ

نیشنل کانفرنسٕکۍ صدر فاروق عبداللہ ہَن کوٚرراتھ اِلزام عٲیِد زِ مرکز چھُنہٕ جموں و کشمیرس ریاستُک درجہٕ بحال کرنس منٛز سنجیدٕ تہٕ ووٚنُن زِ مركزی زیر انتظام علاقک نِظام چھُ عوٲمی مفادَن منٛز رُکاوٹ پٲٹھۍ کٲم کران۔أمۍ سُنٛد بیان آو قونوٗن ساز اسمبلی ہٕنٛدِ طرفہٕ اکھ قرارداد منظور کرنہٕ پتہٕ یَتھ منٛز مرکزَس جموں و کشمیرَس فوری طور پوٗرٕ ریاستُک درجہٕ بحال کرنُک مُطالبہٕ کرنہٕ آمُت اوس۔
تِمو ووٚن بیٚیہِ زِ 5 اگست 2019 برٛونٛہہ یۅسہٕ جموں و کشمیرس خاص حیثیت ٲس سۅٲس یَتہِ کٮ۪ن لوٗکَن ہٕنٛدٮ۪ن دِلن ‘واریاہ نزدیک’ تہٕ یہِ ہیٚکہِ نہٕ زانہہ تہنٛدِ ذہنہٕ منٛزٕ مِٹٲونہٕ یِتھ۔
یَتہِ أکِس اجتماعس منٛز تقریر کٔرِتھ ووٚن تِمو زِ جموں و کشمیرس ریاستُک درجہٕ بحال کرنٕچ جدوجہد چھےٚ ناگزیر بنیمٕژ تِکیازِ مرکز چھُنہٕ یہِ بحال کرنہٕ خٲطرٕ درکار اخلاص تہٕ سنجیدگی ہاوان۔