"افسر چھِ وۄنۍ اسمبلی حکم دِنٕچ کوٗشِش کران”: ایم ایل اےبانڈی پورہ نظام الدین بھٹ

کانگریسٕکۍ سینئر رہنُما تہٕ بانڈی پورہ ہٕکۍ ایم ایل اے نظام الدین بھٹَن چھُ جموں و کشمیرَس منٛز موجودٕ اِنتِظٲمی نظام تہٕ بیوروکریسی ہٕنٛدِس رٔوِیِیَس پٮ۪ٹھ شٔدیٖد تشویشُک اِظہار کوٚرمُت۔ تٔمۍ ووٚن زِ جمہوری حکومتٕچ موجودگی باوجوٗد چھِ منتخب نمایندٕ بے اختیار تہٕ مایوسی محسوٗس کران۔

جوٚمَس منٛزپرٛژار ؤسیٖلن سۭتۍ خصوٗصی کتھ باتھ کٔرِتھ ووٚن نظام الدین بھٹَن زِ ییٚلہِ بیوروکریٹ سپیکرَس براہ راست چِٹھۍ لیکھان چھِ یِم ایوان کٮ۪ن فٲصلَن پٮ۪ٹھ سوال چھِ کران، یہِ چھِ جموٗرِیَتَس تہٕ اسمبلی ہٕنٛز سٮ۪ٹھاہ توہین۔ اسمبلی سپیکرَس افسرَن ہٕنٛدِ طرفہٕ لیٚکھنہٕ آمژن چِٹھٮ۪ن ہُنٛد حوالہٕ دِوان ووٚن تٔمۍ ‘أکِس یِتھِس ایوانَس منٛز ییٚتہِ افسر منتخب نمایندَن ہٕنٛدٮ۪ن فٲصلَن پٮ۪ٹھ سوال چھِ کران تہٕ سپیکرَس چِٹھۍ لیکھنس تام چھِ واتان – یہِ چھِ آیینٕچ تہٕ اسمبلی ہٕنٛز توہین۔