اننت ناگ: 476 نشاور ادوِیات فروش گِرِفتار، 408 معاملہٕ درٕج، 542 کِلوگرام نشاور ادوِیات تہٕ 60 کرورن ہٕنٛزٕ جایدٲد 9 رٮ۪تَن منٛز ضبط ۔

اننت ناگ ضِلعس منٛز چھِ منشیاتٕک کاروبار تہٕ استعمالَس خٕلاف پولیسٕچ کاروٲیی جٲری۔ اننت ناگ پُلیٖس مُطٲبِق آیہِ 2026 کٮ۪ن گۄڈنِکٮ۪ن نَوَن رٮ۪تن دوران منشیاتَس مُتلِق مُختٔلِف دفعَن تحت 408 ایف آئی آر درٕج کرنہٕ، ییٚلہِ زَن 476 ڈرٛگ ڈِیلَر آے گِرِفتار کرنہٕ۔ پُلسہٕ مُطٲبِق آیہِ مُختٔلِف کارروٲیِیَن دوران 542 کِلوگرام کھۄتہٕ زِیٛادٕ نشاور ادوِیات تہٕ باقٕے ممنوعہ چیٖز ضبط کرنہٕ، تہٕ 27,52,976 رۄپیہِ نقٕد تہِ آے ڈرگ ڈِیلَرَن نِش ضبط کرنہٕ۔

غٲر قونوٗنی منشیاتٕچ تجارتہٕ چہِ آمدنی سۭتۍ وابستہٕ تقریباً 60 کرور مالٕچ جائیداد آیہِ 35 معاملَن منٛز ضبط کرنہٕ، ییٚلہِ زَن تقریباً 20 کرور قٕمٕتٕک 20 غٲر قونوٗنی جایداد آیہِ مسمار کرنہٕ۔ پولیسَن ووٚن زِ قونوٗنی طٔریٖقہٕ کار پوٗرٕ کرنہٕ پتہٕ آوتقریباً 2,000 کِلوگرام نشاوردوا تباہ کرنہٕ، تہٕ 305 مرلہٕ زٔمیٖنَس پٮ۪ٹھ آیہِ غٲر قونوٗنی نشاور ادوِیاتن ہُنٛد کاشت تہِ تباہ کرنہٕ۔