رامبن: دۄن سڑک حٲدثَن منٛزاکھ زنانہٕ ہلاک، سکیورٹی اہلکارو سان 46 نفر زخمی۔

جموں و کشمیر کِس رامبن ضِلعَس منٛز گٔے از صُبحٲے قومی شاہراہ-44 پٮ۪ٹھ ماروگ تہٕ کیلا موڈس نزدیٖک 2 الگ الگ سڑک حٲدثہٕ، یَتھ منٛز اکھ زنانہٕ ہلاک تہٕ 46 افراد زخمی سپٕدۍ، یِمَن منٛز سیکیورٹی اہلکار تہِ شٲمِل چھِ۔ پُلسہٕ حُکامَو مُطٲبِق گوٚو گۄڈٕنیُک حٲدِثہٕ صبحٲے 8:50 بجہِ ماروگَس نزدیٖک تَمہِ وِزِ ییٚلہِ مغربی بنگال پٮ۪ٹھٕ جموں گَژھن واجیٚنۍ اکھ مسافر بس، نمبر WB-37D-8989 سڑکہِ پٮ۪ٹھٕ ڈرائیور سٕنٛدِ قوبوُ نِش نیرنہٕ پتہٕ بالہٕ پٮ۪ٹھٕ بۅن گٔیہِ حٲدِثہٕ وِزِ ٲسۍ بسہِ منٛز لَگ بَگ 38 نفر سَوارِ ۔

حٲدِثہٕ پتہٕ وٲتۍ دستی پولیس، مقٲمی رضاکار تہٕ بچاو کَرن واجنہِ ٹیمہٕ موقعہٕ جایہِ تہٕ کٔرٕکھ امدٲدی کاروٲیی شُروٗع تہٕ کٔڈِکھ زخمی مُسافِرَن بسہِ منٛزٕ نٮ۪بر تہٕ تِم آے ایمبولینسو ذٔریعہٕ رامبن ضِلعہٕ ہسپتال منتقٕل کرنہٕ، ییٚتہِ تِمَن طِبی دیکھ بھال آیہِ کرنہٕ۔ پُلسہٕ مُطٲبِق آیہِ اکھ کیو آر ٹی گاڑِ، نمبر JK-02CR-1506 رامبن ضِلعہٕ پُلیٖس لٲنہٕ پٮ۪ٹھٕ زخمی مُسافِرَن ہسپتال واتناونہٕ خٲطرٕ سوزنہٕ۔ تاہم، صبحٲے 9:15 بجہِ کیلا مورہَس نزدیٖک گوٚو اتھ گاڑِ تہِ اکھ سڑک حٲدِثہٕ۔