سائبر سیکورٹی ورٲے چھِ ملکٕچ ترقی ناممکن: شاہ

مرکزی وزیر داخلہ امیت شاہن ووٚن بۄموارِ دۄہ زِ سائبر سیکورٹی چھُ قومی سلامتیُک اکھ اَہَم پہلو تہٕ ووٚن زِ سائبر سیکورٹی ورٲے چھِ کُنہِ تہِ ملکٕچ ترقی ناممکن۔ تٔمۍ ووٚن زِ ٹیکنالوجی چھِ انسٲنی زندگی خٲطرٕ اکھ نعمت، مگر ٹیکنالوجی ہنٛد بڑون استعمال تہٕ چھُ واریٛاہ خطرن جنم دِوان تہٕ یہٕ وجہ چھُ زِ سائبر سیکورٹی چھنہٕ وۄنۍ ڈیجیٹل دنیاہس تام محدوٗد بلکہ چھُ قومی سلامتیُک اکھ اہم پہلو بنیومُت۔ تٔمۍ ووٚن زِ سائبر سیکورٹی ورٲے چھِ کُنہِ تہِ ملکٕچ ترقی ناممکن۔
مسٹر شاہن ووٚن زِ آٮٔی 4 سی ہِوۍ پلیٹ فارم ہٮ۪کَن یِتھٮ۪ن خطرَن سۭتۍ مُقابلہٕ کرنس منٛز واریاہ بوٚڑ حصہٕ نِتھ۔ تٔمۍ کوٚر تمام سٹیک ہولڈرن سۭتۍ لگاتار بیدٲری، ہم آہنگی تہٕ مُشترکہٕ کوششن ہُنٛد مطالبہٕ۔