جموں و کشمیرُک بجٹ چھُ سانہِ مجموعی ترقی پٮ۪ٹھ مرکوز: منوج سنہا

کہؤٹ خبر /اطہر ابنِ اطہر

جموں و کشمیرٕک لیفٹیننٹ گورنر منوج سنہاہن ووٚن زِ پارلیمنٹَس منٛز پیش گژھَن وول جموں و کشمیر بجٹ چھُ سانہِ مجموعی ترقی پٮ۪ٹھ مرکوز، تہٕ ووٚن زِ یَتھ بجٹَس منٛز چھُ تمام طبقَن ہُنٛد خاص خیال تھونہٕ آمُت۔ "بہٕ چُھس ؤزیٖر اعظم نریندر مودی تہٕ ؤزیٖر خزانہٕ نرملا سیتارامن سُنٛد شُکُر گُزار یِمو راتھ مُلکٕچہِ پارلِمٮ۪نٛٹس منٛز تٲریٖخی بجٹ پیش کوٚر۔ تٔمۍ ووٚن زِ یہِ بجٹ کرِ ہندوستانٕچ اکھ مضبوٗط بُنیاد تہٕ جموں و کشمیرٕچ اکھ مضبوٗط بُنیاد تہِ۔ منوج سنہاہَن ووٚن زِ یَتھ بجٹَس منٛز چھِ نوجوان، زنانہٕ، غریب تہٕ کٔمِلۍ، یِم ژۄشوٕے طبقہٕ مرکوٗز روٗدمٕتۍ۔ تٔمۍ ووٚن زِ "کٔمِلین ہٕنٛز آمدنی کِتھ کٔنۍ چھِ بڑان، نوجوانَن کِتھ کٔنۍ چھِ زِیٛادٕ کھۄتہٕ زِیٛادٕ روزگار مِلان تہٕ ناری شکتی کِتھ پٲٹھۍ چھِ مضبوٗط گژھان”۔