مودین کوٚر وایناڈَس منٛز پَسنہٕ سۭتۍ گژھَن وٲلۍ جانَن ہٕنٛدِس نۄقصانَس پٮ۪ٹھ دۄکُھک اظہار

وزیر اعظم نریندر مودی یَن چھُ کیرالہ کِس وایناڈ کٮ۪ن کینٛہہ حصَن منٛز پَسٮ۪و سۭتۍ گژھَن وٲلۍ جانَن ہٕنٛدِس نۄقصانَس پٮ۪ٹھ دۄکھُک اِظہار کوٚرمُت، تٔمۍ چھِ کیرالہ کِس وزیر اعلیٰ پنارائی وجینَس سۭتۍ تہِ کتھ کٔرمٕژ تہٕ تتہِ کِس موٗجوٗدٕ صورتہِ حالَس مدنظر مرکٔزی حکوٗمتَس طرفہٕ تمام مُمکنہٕ مددُک یقین دِیُتمُت۔ تٔمۍ کوٚر مرن والٮ۪ن ہٕنٛدٮ۪ن وارثن خٲطرٕ 2,00,000 رۄپیہِ تہٕ زخمیَن خٲطرٕ پرٛٮ۪تھ أکِس 50,000 رۄپیہِ نقد امداد دِنُک تہِ اعلان۔
وزیر اعظمن کوٚر X اپلیکشنہِ پیٹھ پوسٹ۔
"وایناڈ کٮ۪ن کینٛہَن حِصَن منٛز پَسٮ۪و سۭتۍ چھُ سٮ۪ٹھاہ افسوس۔ میٲنۍ خیالات چھِ تِمَن سارِنٕے لوٗکَن سۭتۍ یِمَو پنٕنۍ ٹٲٹھۍ مٲرۍ مٕتۍ چھِ تہٕ زخمیَن ہٕنٛدِ جلدی صحتیابی خٲطرٕ دُعا تمام مُتٲثِر لُکن ہِنٛدِ مدتہٕ خٲطرٕ چھِ وُنکیٚنَس بچاو کٲم جٲری۔
پارلیمانی امور کِس وزیرِ کِرن رِجیجوَن ووٚن زِ کانٛہہ تہِ قۄدرٔتی آفت چھِ مُلکہٕ خٲطرٕ اکھ سٔنجیٖدٕ معاملہٕ۔ نہ صِرِف کیرالہ بلکہِ یہِ چھُ پرٛٮ۪تھ أکِس خٲطرٕ تشویشُک معاملہٕ۔