ہندوستانٕچ زرعی تنوع چھِ عالمی غذٲیی تحفظ خٲطرٕ وۄمید ہٕنٛز کرن: نریندر مودی

نَیہِ دِلہِ: ؤزیٖر اعظم نَرینٛدر مودِین ووٚن بَٹہٕ وارِ دۄہ زِ زٔمیٖن دٲری منٛز ہِنٛدُستانُک تنوع چُھ مُلُک دُنیاہٕچہِ غذٲیی حِفاظتہٕ خٲطرٕ وۄمید ہُنٛد مُطٲبِق بَناوان۔
مسٹر مودی اوس نَیہِ دِلہِ منٛز مُنعقد "زرعی مٲہرِ معاشِیاتن ہِنٛز بین الاقوٲمی کانفرنس” ہُنٛد افتتاح کران۔
یہِ کانفرنس چھِ ہندوستانَس منٛز 65 ؤرۍ یَو پتہٕ منعقد کرنہٕ آمٕژ۔ ستن دۄہن ہِنٛزِ اَتھ کانفرنسس منٛز چھِ پوٗرٕ دُنیاہ پٮ۪ٹھ 1000 کھۄتہٕ زِیٛادٕ مندوبین حصہٕ نِوان، یِمَو منٛز 40 فی صٔدی کھۄتہٕ زِیٛادٕ زنانہٕ نمائندٕ چھِ۔ وزیر زراعت شیوراج سنگھ چوہانَن تہِ کوٚر افتتاحی اجلاسَس منٛز خطاب تہٕ ووٚن زِ وزیر اعظم مودی سنٛز قیادتَس منٛز حکومت کِس اقداماتو سۭتۍ چھُ آز ہندوستانَس منٛز دُنیاہَس منٛز زرعی شعبٕچ ترقی ہٕنٛز شرح ساروِی کھۄتہٕ زِیٛادٕ تہٕ ہندوستان چھُ زرعی پٲداوارَس منٛز اضافہٕ سۭتۍ سۭتۍ انسٲنی تہٕ زمینی صحتَس پٮ۪ٹھ توجہ دِوان۔
پننِس افتتاحی تقریرَس منٛز ووٚن وزیر اعظمَن زِ 65 ؤری برٛونٛہہ ییٚلہِ ہندوستانَن میسورَس منٛز یہِ کانفرنس منعقد کٔر، ہندوستانٕچ فوڈ سیکورٹی ٲس دنیاہَس باپتھ تشویشُک معاملہٕ۔