14 تہٕ 15 دسمبر کٔشیٖرِ منٛز ہلکہٕ شیٖن پیٚنُک امکان

محکمہ موسمیات چہِ پیشن گویی مُطٲبِق چھُ وادی کٔشیٖرِ منٛز جٲری خۄشٕک موسم یُس 14 تہٕ 15 دسمبر پہٲڑی علاقن منٛز ہلکہٕ شیٖن پیٚنہٕ سۭتۍ ختم گژھنُک امکان چُھ ۔
مُتعلقہٕ محکمہٕ کِس ترجمانَس مُطٲبِق چھُ جموں و کشمیرُک موسم یِنہٕ والٮ۪ن دۄہَن منٛز خۄشٕک روزنُک اِمکان۔
تٔمۍ وو٘ن زِ پتہٕ چھُ کمزور مغربی خلل کہِ اژنہٕ کِنۍ 14 تہٕ 15 دسمبر شُمال، وسطی تہٕ جنوبی کشمیٖر کٮ۪ن پہٲڑی علاقن منٛز ہلکہٕ شیٖن پیٚنُک امکان، ییٚلہِ زَن اَتھ وقتَس دوران چھُ مٲدٲنی علاقن تہٕ نشیبی علاقن منٛز تہِ روٗد پیٚنُک امکان۔
تٔمۍ ووٚن زِ اَمہِ پتہٕ روزِ 18 دسمبر شام تام موسم بیٚیہِ خۄشٕک۔
محکمہٕ مُطٲبِق ہیکہِ بیٛاکھ کمزور مغربی خلل 20 تہٕ 21 دسمبرَس انٛدۍ پٔکھۍ جموں و کشمیرَس منٛز دٲخٕل گژھِتھ، ییٚمہِ کِس نٔتیٖجس منٛز کینٛہَن پہٲڑی علاقَن منٛز ہلکہٕ شیٖن پیٚیہِ تہٕ مٲدٲنی علاقَن منٛز کینٛہَن جاین ہلکہٕ روٗد پیٚیہِ۔