سرینگر مُنورآباد علاقَس منٛز رٲتۍ کیُت نار، مینوفیکچرنگ یونٹ تہٕ 12 دُکان خاکستر۔
راتھ رٲژ شہر کِس مُنوَرآباد علاقَس منٛز اچانک نار لگنہٕ سۭتۍ گٔے اکھ مینوفیکچرنگ یونٹ تہٕ کم از کم باہ دُکان خاکستر ۔ یہِ واقعہٕ گوٚو شامَس لگ بگ 10:30 بجہِ، ییٚلہِ مقٲمی لوٗکَو عمارتہٕ منٛزٕ نار تہٕ دٔہہ وُچھِتھ فوری طور فائر اینڈ ایمرجنسی سروسَس خبردار کوٚر۔
فائر اینڈ ایمرجنسی سروسٕکۍ أکۍ اعلیٰ اہلکارَن ووٚن زِ ییٚلہِ تِمَن معلوٗمات میلنہٕ پتہٕ آے واریاہ ٹیٖم موقعہٕ جایہِ پیٹھ تہٕ بَہہ نار ٹینکرَن ہٕنٛدِ مدتہٕ سۭتۍ واریاہَن گھنٹَن ہٕنٛزِ شدید کوٗشِشہِ پتہٕ سپٕدۍ نار قوبوٗ کرنَس منٛز کامیاب۔
چشمہٕ دیٖد گواہَو مُطٲبِق لوٚگ نار سٲرِسٕے کمپلیکسَس، ییٚلہِ زَن دُکاندار ٲسۍ بے بسی سان پنٕنۍ محنتہٕ سۭتۍ کماونہٕ آمٕژ کمائی تباہ گَژھان وٕچھان۔ مُقٲمی لوٗکَو کٔر فائر سروسَس سۭتۍ نار ژھیوراونَس منٛز مدد کرنٕچ کوٗشش، مگر نارٕچ شِدژکٔر گۄڈٕ تِہٕنٛزِ کوٗشش ناکام۔