*شری نگر ائیرپورٹ پیٹھہٕ اَز تِجٲرَتی جہاز منسوخ: ائیرپورٹ اَتھارٹی*

شری نگر ائیرپورٹ اَتھارٹی یَن کٔرژ اَتھوار دۄہ اَتھ کَتھہِ تَصدیق زِ اَز (ژٔنٛدرٕ وار دۄہ) چِھ ائیرپورٹ پیٹھہٕ کینٛہہ تہِ تِجٲرَتی (کَمٔرشَل) طَیارٕ چَلنَے نی۔اؠکس (سَبقَہ ٹوِٹَر) پؠٹھ مُسافِرَن خٲطرٕ جٲری کٔرمٔژ اَکھ اَیڈوائِزری مَنٛز ائیرپورٹ اَتھارٹی یَن وُنت زِ ژٔنٛدرٕ وار تہِ بوموار خٲطرٕ تَجوِیز کَرنہٕ آمُت ‘نوٹام’ (NOTAM) واپس نؠنہٕ پَتہٕ چِھ ہوٲئی کَمپنِیاں (ایئرلائنز) پَنُن فَلائِٹ شٔڈول دوبارہ بَناونَس مَنٛز مَشغوٗل۔اَیڈوائِزری مَنٛز وَننہٕ آو، "اَتھ عَمَلَس مَنٛز ہؠکِہ کینٛہہ وَقَت لَگِتھ۔”اُمید چِھ زِ بوموار دۄہ پیٹھہٕ فَلائِٹ اۆپریشن دوبارہ شُروع گَژھَن، ییلی کَمپنِیاں پَنُن نۆو شٔڈول نَشَر کَرَن۔مُسافِرَن چِھ اَپِیل کَرنہٕ آمٔژ زِ ائیرپورٹ گَژھنہٕ بَروشہٕ کَرَن تِم پَنہِ پَنہِ ہوٲئی کَمپنی سِیت رٲبِطہٕ تہٕ صٔحیح مَعلوٗمات حٲصِل۔ائیرپورٹ اَتھارٹی یَن وُنت، "اؠسہٕ چِھ تُہنٛزِ صَبَر تہٕ تَعاوُنُک شُکرِیہِ اَدا کَران۔”