کُلگام مُقابلہٕ: 5 ملی ٹنٹ ہلاک، 2 فوجی زخمی، آپریشن جٲری: فوج

جنوٗبی کشمیر کِس ضلعہٕ کُلگام کِس قادر علاقَس منٛز چھِ جٲری کارروٲیی دوران پانٛژھ نامعلوم ملی ٹنٹ ہلاک تہٕ زٕ فوجی اہلکار زخمی گٔمٕتۍ۔ فوجٕکہِ چِنار کورَن ووٚن ‘ایکس’ پٮ۪ٹھ أکِس پوسٹَس منٛز زِ "سیکورٹی فورسَن کٔرۍ کُلگام کِس کِڈر علاقَس منٛز جٲری کارروٲیی دوران پانٛژھ ملی ٹنٹ مارٕ”۔ تٔمۍ ووٚن زِ جھڑپَس دوران گٔیہِ زٕ جوان زخمی تہٕ یِم آیہِ علاج خٲطرٕ خٲلی کرنہٕ۔
کشمیر زون پولیسَن ووٚن برٛسوارِ دۄہ صُبحٲے ‘ایکس’ کِس أکِس پوسٹَس منٛز، "کُلگام کِس کِڈر علاقَس منٛز چھُ مُقابلہٕ شُروٗع گوٚمُت”۔
امہِ برٛونٛہہ ووٚن ذٔرایعو زِ حِفاظتی فوجن کوٚر کُلگام کِس کِڈر علاقس گیرٕ بٔنٛدی تہٕ ملی ٹنٹن ہِنٛزِ موٗجوٗدٕگی ہِنٛز قٲبلِ اعتماد اطلاع مِلنہٕ پتہٕ کٔرٕن تلاشی مہم شُروٗع۔ تٔمۍ ووٚن زِ ییٚلہِ تلاشی کاروٲیی ہٕنٛز اکھ جمٲژ مشتبہ جایہِ نزدیٖک آیہِ، تتہِ ژوٗرِ روزَن وٲلۍ ملی ٹنٹو کٔر اتھ پٮ۪ٹھ گولہِ چلٲوِتھ، ییٚمہِ سۭتۍ دۄشوٕنی فریقَن درمیان جھڑپ گٔیہِ۔