یومِ آزٲدی: عمر عبداللہ ہن لَہروو بخشی سٹیڈیمس منٛز جھنٛڈٕ۔

جموں و کشمیر کہِ وزیر اعلیٰ عمر عبداللہ لَہرٲو جمعہ دۄہ صُبحٲے مُلکٕچ 79 ہِمہِ یومہِ آزٲدی کِس موقعس پٮ۪ٹھ بخشی سٹیڈیمَس منٛز جھنڈٕ تہٕ رٔٹٕن پریڈَس منٛز سلٲمی ۔ نیشنل کانفرنسٕک صدر ڈاکٹر فاروق عبداللہ، پی ڈی پی صدر محبوبہ مفتی تہٕ واریٛاہ باقی اَہَم رہنُما ٲسۍ اَتھ موقعس پٮ۪ٹھ موجود۔ اتھ تقریٖبہِ منٛز کٔر واریاہو تعدادَو لوکَو تہِ حصہٕ۔ امہِ برٛونٛہہ کوٚر وزیر اعلیٰ لال چوکَس منٛز واقع شہیدَن ہٕنٛدِس یادگار ہُنٛد دورٕ، ییٚتہِ تٔمۍ شٔہیٖدَن خراج عقیدت پیش کوٚر۔ یہِ چھُ قٲبلِ ذِکِر زِ جموں و کشمیرَس منٛز یومِ آزادی ہٕنٛز مرکٔزی تقریب چھِ سرینگر کِس بخشی سٹیڈیمَس منٛز منعقد کرنہٕ یِوان۔ تقریٖب ہٕنٛدِ مُنٲسِب تہٕ پُرامن انعقاد یٔقیٖنی بناونہٕ خٲطرٕ چھِ سخٕت حِفاظتی اِنتِظام کرنہٕ آمٕتۍ۔