شوپیانس منٛز رہٲیشی مکانس پیٹھ پولیسُک چھاپہٕ، ممنوعہ نشہ آور دوا برآمد.

جموں و کشمیر پولیسَن کوٚر منشیاتَس خٕلاف جٲری مُہمہِ ہِنٛدِ حصہٕ پٲٹھۍ شوپیاں کِس زینا پورہ علاقَس منٛز أکِس رہٲیشی مکانہٕ منٛزٕ 570 گرام چرٕس ہیوٗ ممنوعہ مادٕ برآمد ۔
خبر چھِ دِنہٕ آمٕژ زِ پُلسہٕ ٹیٖمَن کوٚر فرسٹ کلاس ایگزیکٹو مجسٹریٹَس سۭتۍ مِلِتھ زینا پورہ کِس روزَن وٲلِس غلام حسن ڈار سٕنٛدِس نیچوِس نثار احمد ڈار سٕنٛدِس گھرَس پٮ۪ٹھ چھاپہٕ۔ چھاپَس دوران آو 570 گرام چرٕس ہیوٗ ممنوعہ مادٕ ضبط کرنہٕ۔ مُلزِم چُھ فرار گوٚمُت، تہٕ أمِس رٔٹنہٕ خٲطرٕ چھِ بٔڑِس پیمانَس پٮ۪ٹھ کاروٲیی جٲری
پولیسَن چُھ عوامس اپیل کٔرمٕژ زِ اگر تِم نشاور ادوِیات کٕننٕچ یا بیٚیہِ کانٛہہ مُجرمانہٕ واقعہٕ وُچھان چھِ تِم کٔرِن فوری نزدیٖکی پُلیٖس تھانس سۭتۍ رٲبطہٕ۔ پولیسَن دِیُت یٔقیٖن زِ معٲشرَس منٛز منشیاتُک خطرٕ ختم کرنہٕ خٲطرٕ یِیہِ قونوٗن مُطٲبِق مُجرِمن خلاف سخٕت کاروٲیی کرنہٕ۔