جموں و کشمیر: کٹرا روڈ حٲدثس منٛز 3 افراد ہلاک، 2 زخمی۔

جموں و کشمیر، ریاسی ضِلعہٕ کِس کٹرا علاقَس منٛز بۄموارِ دۄہ صُبحٲے أکِس افسوسناک سڑک حٲدثس منٛز گٔیہٕ 3 نَفر موقعہٕ پٮ۪ٹھے ہلاک تہٕ باقٕی 2 شدید زخمی۔ ذٔرایعَو دِژ اطلاع زِ بۄموارِ دۄہ صُبحٲے گوٚو کٹرا ہیلی پیڈَس نزدیٖک أکِس بسہِ تہٕ آٹو رکشاہَس درمیان شٔدیٖد ٹکراو۔ تِمَو ووٚن زِ یہِ حٲدِثہٕ اوس یوٗتاہ خوفناک زِ اَمہِ کِس نٔتیٖجس منٛز گٔیہِ فوری طور 3 نَفر ہلاک تہٕ باقٕی 2 زخمی۔ تِمَو ووٚن زِ مرن والٮ۪ن منٛز چھِ اکھ آٹو رکشہ ڈرائیور تہٕ زٕ زائرین شٲمِل۔ زخمیَن آیہِ گۄڈٕ طبی علاج باپتھ سی ایچ سی کٹرا نِنہٕ تہٕ پتہٕ آے گورنمنٹ میڈیکل کالج جموں سوزنہٕ۔ مرن والٮ۪ن تہٕ زخمیَن ہٕنٛز شناخت چھِنہٕ وٕنیُک تام معلوٗم۔ أتھۍ دوران ووت پولیس واقعہٕچ جایہِ تہٕ کٔرٕکھ قونوٗنی کاروٲیی شُروٗع۔