بانہالس منٛز دردناک واقعہ، مول تہٕ نیٚچُو بیک وقت فوت۔

جموں و کشمیر کِس ضلع رام بن کِس بانہال علاقس منٛز آو بومہٕ وار صبحٲے اکھ دل دوز واقعہ پیش۔ ییٚلہِ اکھ مول پنُن بٮ۪مار نیٚچوِس علاج کرناونہٕ خٲطرٕ ہسپتال گثھان اوس تہٕ وتے سپُد أمۍ سُنٛد نیٚچُو أمۍ سٕنٛزِ کھوٚنہِ منٛز فوت تہٕ صدمہ ستۍ پیوٚو مٲلِس دِلُک دورہ تہٕ سُہ تہِ سپُد موقعس پٮ۪ٹھ ازجان۔فوت سپدن والٮ۪ن مٲلِس نیٚچِوۍ سٕنٛدۍ ناو چھِ
﴿مول﴾ شبیر احمد گنائی ولد محمد اکبر تہٕ 14 وۅہر بٮ۪مار نیٚچُو ساحل احمد یُس علاج کرناونہٕ خٲطرٕ ہسپتال نِنہٕ یِوان اوس۔
امہِ دردناک واقعہ پتہٕ پٔھہلیٚاو تتھار بانہال علاقس منٛز صفِ ماتم ۔ مقٲمی لُکو دیُت یہِ واقعہ دل دوز سانحہ قرار ۔
روزن والٮ۪و کوٚر مٲلِس تہِٕ نیٚچِو سٕنٛدِس ناگہٲنی مرنس پٮ۪ٹھ دۅکھُک تہٕ افسوسُک اظہار تہٕ کٔرٕکھ لواحقینن ستی ہمدردی ظٲہر۔