جموں و کشمیرُک موسم یِنہٕ وٲلِس ہفتس تام خۄشٕک روزنُک امکان۔

محکمہٕ موسمیاتَن چھِ پیشن گویی کٔرمٕژ زِ جموں و کشمیرُک موسم روزِ عام طور یِنہٕ والہِ اکہِ ہفتہٕ کھۄتہٕ زیادٕ وقتَس تام خۄشٕک۔ وۄنٛہِ گوٚو، اتھ وقتس دوران چھُ شُمٲلی کشمیٖر کٮ۪ن پہٲڑی علاقَن منٛز ہلکہٕ شیٖن پیٚنُک اِمکان۔ محکمٕکہِ ترجمانَن ووٚن زِ 17 پٮ۪ٹھٕ 20 اکتوبرَس تام چھُ جموں و کشمیرُک موسم عام طور خۄشٕک روزنُک اِمکان، حالانٛکہِ 18 اکتوبر شامَس ہیکہِ اوٚبرُ ٲسِتھ۔ تِمَو ووٚن زِ 21 اکتوبر چھُ شُمٲلی کشمیٖر کٮ۪ن کینژھن پہٲڑی علاقَن منٛز ہلکہٕ شیٖن یا روٗد پیٚنُک اِمکان۔ تِمَو مُطٲبِق چھُ 22 پٮ۪ٹھٕ 23 اکتوبرَس تام موسم عام طور خۄشٕک روزنُک امکان۔ ترجمانَن ووٚن زِ 24 اکتوبر چھُ شُمٲلی کشمیر کٮ۪ن پہٲڑی علاقَن منٛز بیٚیہِ ہلکہٕ شیٖن پیٚنُک امکان۔ تِمَو ووٚن زِ پتہٕ چھُ 25 تہٕ 26 اکتوبر روزِ موسمس کُنہِ حدس تام اوٚبُر مگر خۄشٕک روزِ۔ أتھۍ دوران چھُ جموں و کشمیر کٮ۪ن زِیٛادٕ تر علاقَن منٛز رٲژ ہُنٛد درجہٕ حرارت معموٗل کھۄتہٕ زیادٕ ریکارڈ کرنہٕ آمُت۔ محکمہٕ موسمیات مُطٲبِق چھُ کٔشیٖرِ منٛز رٲژ ہُنٛد درجہٕ حرارت 1 پیٹھٕ 3 ڈگری سیلسیس تام ریکارڈ کرنہٕ آمُت۔