سرینگرَس منٛز اسمبلی اجلاسَس برٛونٛہہ غٲر معموٗلی حِفٲظتی اِنتِظام، اضٲفی اہلکارَن ہٕنٛز تعیناتی :جے کے-سرینگر سیکیورٹی بندوبست

جموں و کشمیر قانون ساز اسمبلی ہٕنٛدِ اجلاسَس برٛونٛہہ چھِ سرینگرَس منٛز انتہٲئی سخت تہٕ غٲر معموٗلی حِفٲظتی اِقدامات نافذ کرنہٕ آمٕتۍ۔ ذرایعو مُطٲبِق چھِ لال چوک، ڈل گیٹ، سول سیکرٹریٹ تہٕ اسمبلی علاقَس أنٛدۍ پٔکھۍ کُنہِ تہِ مُمکنہٕ ناخوشگوار واقعہٕ رُکاونہٕ خٲطرٕ علاوٕ سیکورٹی فورس تعینات کرنہٕ آمٕتۍ۔ پولیس تہٕ نیم فوجی اہلکار چھِ شہرَس منٛز حساس مقامات، اہم دٲخلی تہٕ نٮ۪بر نیرنٕچ وتن سۭتۍ سۭتۍ اَہَم سڑکَن پٮ۪ٹھ تٔعینات کرنہٕ آمٕتۍ۔ اسمبلی عمارتہِ اندر تہٕ نٮ۪برٕ کٔنۍ چھُ حِفٲظتی محاصرٕ مٔزیٖد مضبوٗط کرنہٕ آمُت، مرکٔزی تہٕ رِیاستی سیکورٹی ایجنسیہٕ چھِ مُشترکہٕ طور ہوشیار روزان۔ ذٔرایعَو وون زِ اسمبلی اجلاسٕچ حِفٲظتی چھِ ترٛٮ۪ن تہَن منٛز تقسیٖم کرنہٕ آمٕژ: أنٛدرِم دٲیرٕ، درمیٲنی دٲیرٕ تہٕ نیٔبرِم دٲیرٕ۔ صرف مجاز ارکان، سرکٲرِ اہلکار، تہٕ سیکورٹی اہلکار ہیکن اندرونی دٲیرَس منٛز دٲخٕل گژھِتھ، ییٚلہِ زَن منٛزمِس دٲیرس منٛز چھِ میڈیا نُمایندَن تہٕ مجاز عملَن خصوٗصی پاسَو ذٔریعہٕ اژنُک اجازت دِنہٕ یِوان۔