سپیکر اسمبلی سٕنٛدۍ ہِدایت: ایل جیس تحت محکمن مُتعلِق سوال گژھن نہٕ پیش کرنہٕ یِنۍ۔

جموں و کشمیر اسمبلی ہٕنٛدِ سپیکر عبدالرحیم راتھرَن دِیُت از اسمبلی ہٕنٛدٮ۪ن رُکنَن ہدایت زِ تِم کَرن نہٕ تِمن محکمَن مُتعلِق سوال پیش یِم لیفٹیننٹ گورنر (ایل جی) سٕنٛدِس دٲیرٕ اختیارس منٛز یِوان چھِ۔

سپیکرَن دِیُت یہِ بیان تَمہِ وِزِ ییٚلہِ محکمہٕ داخلہٕ سۭتۍ وابستہٕ لنگیٹ کِس ایم ایل اے شیخ خورشید سُنٛد سوال اسمبلی ایجنڈہ پٮ۪ٹھٕ ہٹاونہٕ آو ۔ سپیکرَن کٔر واضح زِ ‘شیخ خورشید سُنٛد سوال اوس ایل جی سٕنٛدِس دٲیرٕ اختیارس تحت أکِس محکمَس مُتلِق، اَمہِ مۄکھٕ پیوٚو یہِ جموں و کشمیر تنظیم نو ایکٹَس تحت حذف کرُن’۔

عوامی اتحاد پارٹی سۭتۍ وابستہٕ شیخ خورشید اوس حکوٗمتَس پرژھمُت زِ جموں و کشمیرَس منٛز تشددُک شکار گژھَن والٮ۪ن عیالَن کیازِ چھِ ایس آر او-43 ہَس تحت ایکس گریشیا ادایگی یا باقی فٲیدٕ فراہم کرنس منٛز ژیر گژھان۔ کیٚنٛہن مخصوٗص معاملَن ہُنٛد حوالہٕ دِوان اوس تٔمۍ حکوٗمتَس نِش معاوضہٕ دِنہٕ خٲطرٕ واضح ٹایِم لائنٕچ تہِ منٛگ کٔرمٕژ یُتھ مُتٲثِر خاندانَن انصاف میلہِ۔