کشمیر چھُ اِنسٲنِیتٕچ پہچان، زانہہ تہِ چھُنہٕ ییٚتہِ غٲر محفوظ محسوٗس گژھان : راج ببر

بالی ووڈٕکۍ مشہوٗر اداکار تہٕ سینئر سِیاستدان راج ببرَن ووٚن زِ کٔشیٖر چھُ أمۍ سٕنٛدِس فلمی کیریئرَس منٛز اکھ بُنیٲدی سنگ میل روٗدمُت تہٕ تٔمِس چھُنہٕ یتہِ زانہہ غٲر محفوظ محسوٗس کوٚرمُت۔ تٔمۍ ووٚن زِ کٔشیٖرِ ہُنٛد ہوا چُھ محبت، امن تہٕ انسانیتٕچ خوشبو سۭتۍ بٔرِتھ۔

راج ببرَن کوٚر یِمن خیالاتن ہُنٛد اظہار گُلمرگہِ منٛز أکِس تقریٖبَس دوران ۔ تٔمۍ ووٚن، ‘میانہِ فلمی پیشورانہٕ زِندگی ہُنٛد آغاز سپُد کٔشیٖرِ پٮ۪ٹھٕ ۔ 1980 پٮ۪ٹھٕ 1996-97 تام آسہِ نہٕ شایِد کانٛہہ تہِ فِلم یۄس نہٕ مےٚ کٔشیٖرِ منٛز شوٗٹ کٔرمٕژ آسہِ۔ چاہے یہِ ارمان آسہِ یا آپ کی پاس کی بات – کٔشیٖر چھےٚ ہمیشہٕ میانٮ۪ن فلمَن ہُنٛد حصہٕ روٗدمُت۔

اداکارَن ووٚن زِ أمِس چھُ وادی منٛز ہمیشہٕ محبت تہٕ احترام مِلٮ۪ومُت۔ ‘مےٚ چُھ نہٕ کٔشیٖرِ منٛز زانہہ خوف محسوٗس کوٚرمُت۔ یتِکۍلوٗکھ چھِ ہمیشہٕ اسنہٕ تہٕ اخلاص سان خوش آمدید کران، تہٕ یہِ محبت چھِ از تہِ تیوٗتی مضبوٗط۔’

راج ببرَن کٔر گُلمرگ ڈیولپمنٹ اتھارٹی ہٕنٛدِس سی ای او تہٕ مُقٲمی انتظامیہٕکۍ مہمان نوازی ہٕنٛدۍ تہِ تعریٖف کٔرِتھ تہٕ وونُن زِ کٔشیٖرِ ہٕنٛز اصلی خوٗبصوٗرتی چھےٚ اَمہِ کٮ۪ن لوٗکَن ہِنٛدِس اِنسٲنِیتس منٛز پوشیدٕ۔