انجینیر رشیدن کٔر دِلہِ منٛز دھماکہٕ تہٕ بڑوٕنِس تشددَس خلاف احتجاج کرنہٕ خٲطرٕ تِہاڑ جیلَس منٛز دۄن دۄہَن ہٕنٛز بھوک ہڑتال شُروٗع۔

عوامی اتحاد پارٹی (اے آئی پی) ہٕکۍ چیف ترجمان، انعام النبی یَن کٔر از تصدیٖق زِ بارہمولہ ہٕکۍ جیلَس منٛز بند ایم پی انجینیر رشیدن چھےٚ نیہِ دِلہِ منٛز تہاڑ جیلس منٛز دۄن دۄہَن ہُنٛد فاقہٕ ﴿بھوک ﴾ہڑتال شُروٗع کوٚرمُت۔

انجینیر رشید سٕنٛدۍ جیل ڈائریکٹر جنرل سٕننٛدِ چِٹھہِ ہُنٛد حَوالہٕ دِوان ووٚن اِنعام النبین زِ یہِ بھوک ہڑتال چھےٚ حالٕے دِلہِ دھماکَس منٛز بےٚ گناہ جانَن ہٕنٛدِس نۄقصانَس خلاف احتجاج کرنہٕ تہٕ ڈاکٹرَن ہٮ۪تھ تعلیم یافتہٕ کٲشِرٮ۪ن ہٕنٛدِس تشددَس کُن تبدیل گژھنٕچ خبرَن پیٹھ شٔدیٖد تشویشُک اظہار کرنہٕ خٲطرٕ۔

انجینیر رشیدَن ووٚن پننِہ چِٹھہِ منٛز زِ أمۍ سٕنٛدِ احتجاجُک مقصد چھُ کٲشِرٮ۪ن یاد پاوُن زِ "أسۍ ہیکَو نہٕ پنٕنۍ نوجوان تہٕ تعلیم یافتہٕ نسل راوٕنُک متحمل گژھِتھ” تہٕ یہِ واضح کرُن زِ "مہذب معاشرَس منٛز چھِنہٕ تشددٕچ کانٛہہ جاے”۔