سرینگر پولیسَن کٔر سٲرِسٕے شہرَس منٛز کیمیٲیی تہٕ کھادٕ دُکانَن ہُنٛد سخٕت معٲینہٕ

وادی منٛز بڑوٕنہِ حِفٲظتی اِنتِظام کہِ پیش نظر کٔر سرینگر پولیسَن جُمعہ دۄہ شہر کٮ۪ن مُختٔلِف حِصن منٛز کیٖمیٲیی تہٕ کھادٕ کٕنَن والٮ۪ن دُکانَن ہُنٛد جامع معٲینٕچ مُہِم شُروٗع۔ پُلیٖس مُطٲبِق چھُ امہِ کاروٲیی ہُنٛد مقصد حساس موادُک مُمکِنہٕ غلط استعمال رُکاوُن تہٕ کاربٲری سرگرمییہِ قونوٗنَس مُطٲبِق انجام دِنہِ۔

ذٔرایعَو وون زِ خصوصی پولیس ٹیمو کوٚر واریاہَن علاقَن منٛز دُکانَن ہُنٛد معٲینہٕ، یِمَن منٛز پُلیٖس تھانہٕ نوہٹہ، لال بازر، شہید گنج، چندرپورہ، راج باغ، آر ایم باغ، ہارون، نیشت، ایم آر گنج، صفاکدل، زادِبل، حضرت بل، نِگین تہٕ صدر شٲمِل چھِ۔

کاروٲیی دوران کٔر پولیس اہلکارو سٹاک رجسٹر، خریدٲری تہٕ فروخت ریکارڈ، خٔریٖدارَن ہٕنٛز شناخت کرنٕکۍ طٔریٖقہٕ، تہٕ کیمیکل یا کھادَن ہُنٛد محفوٗظ ذخیرٕ کرنٕچ جانچ یِم غلط استعمال کرنہٕ سۭتۍ حفاظتی خدشات پٲدٕ ہیٚکن سپدِتھ ۔ اَمہِ علاوٕ آیہِ دُکانَن ہٕنٛزٕ لاسنہٕ، قونوٗنی قٲیدٕ، تہٕ حفٲظتی ہِدایتن ہٕنٛز تعمیل تہِ تصدیق کرنہٕ۔