پلوٲمِس منٛز 2 ڈرگ ڈِیلَر گِرِفتار، بٔڑِس مِقدارَس منٛز براون شوگر مادٕ برآمد: پُلیٖس

پلوامہ پولیسَن کٔرۍ منشیاتن خٕلاف کارروٲیِی منٛز زٕ ڈرگ ڈِیلَر گِرِفتار تہٕ کوٚرُکھ بٔڑِس مِقدارَس منٛز براون شوگر ہیوٗ ممنوعہ مادٕ ضبط۔
پُلیٖس ترجمانَن ووٚن أکِس بیانَس منٛز زِ نارکو ٹیرر سپلائی چینَس خٕلاف اکہِ بجہِ کارروٲیِی منٛز کٔرۍ پلوامہ پولیسَن زٕ منشیات سمگلر گِرِفتار تہٕ 1 کِلو 130 گرام براون شوگر ہیوٗ ممنوعہ مادٕ کوٚرُکھ برآمد۔
تٔمۍ ووٚن زِ یہِ آپریشن اوس معموٗل چیکنگ دوران کرنہٕ آمُت۔
تٔمۍ ووٚن زِ رحمو پولیس چوکہِ ہٕنٛزِ أکۍ ٹیٖمَن رُکوو رحمو کٔدلَس پٮ۪ٹھ تلٲشی دوران رجسٹریشن نمبر JK09D-7662 واجِنۍ اکھ شَکاوَر ٹاٹا موبایِل گٲڑۍ۔
پُلسہٕ ترجمانَن ووٚن زِ ناکہٕ ٹیمٕچ ہُشٲری تہٕ پیشہٕ ورانہٕ کاروٲیی کِنۍ آے گاڑِ منٛز سوار دۄشوٕے نفر حِراستَس منٛز نِنہٕ، یِمَن ہٕنٛز شناخت حاجی تیرا کاناہٕکۍ روزَن وٲلۍ عبدالحمید شیخ سُنٛد نیٚچُو مُنیر احمد شیخ تہٕ حاجی تیرا کاناہٕکۍ روزَن وٲلۍ محمد رفیق شیخ سُنٛد نیٚچُو توفیق احمد شیخ ناوٕ سۭتۍ کرنہٕ آمٕژ چھےٚ۔