کٔشیٖرِ منٛز ونٛدٕ تیز ، شوپیاں سارِوٕے کھۄتہٕ سرد علاقہٕ۔

وادی کٔشیٖرِ منٛز چھُ سردٕ ونٛدٕچ شِدَت ہُریومٕژ تِکیٛازِ رٲژ ہُنٛد درجہٕ حرارت چھُ بیٚیہِ اکہِ لٹہِ کم گوٚمُت۔ وادی منٛز چھُ جنوبی کشمیر شوپیاں ضِلعہٕ سارِوٕے کھۄتہٕ سرد علاقہٕ قرار دِنہٕ آمُت، یَتھ منٛز کم از کم درجہ حرارت منفی 5.0 ڈگری سیلسیس چھُ۔ کشمیر موسمہٕ مُطٲبِق آو رٮ۪تہٕ کالہِ رازدٲنی سرینگرَس منٛز کم از کم درجہٕ حرارت منفی 2.5 ڈگری سیلسیس ریکارڈ کرنہٕ، ییٚتہِ راتھ رٲژ درجہٕ حرارت منفی 1.9 ڈگری سیلسیس ریکارڈ کرنہٕ آو۔ موجودٕ موسمٕچ سارِوٕے کھۄتہٕ سرد رات آیہِ 28 نومبر سرینگرَس منٛز ریکارڈ کرنہٕ، ییٚلہِ رٲژ ہُنٛد درجہٕ حرارت منفی 4.5 ڈگری سیلسیس تام کم گوٚو۔ وادی ہٕنٛدِس مشہوٗر سیاحتی مُقام پہلگامَس پٮ۪ٹھ آو کم از کم درجہٕ حرارت منفی 2.2 ڈگری سیلسیس ریکارڈ کرنہٕ، ییٚلہِ زَن راتھ رٲژ ہُنٛد درجہٕ حرارت منفی 0.4 ڈگری سیلسیس اوس۔ وادی ہٕنٛدِس عالمی شہرت یافتہ سیاحتی مُقام گُلمرگہِ منٛز آو کم از کم درجہٕ حرارت 0.0 ڈگری سیلسیس ریکارڈ کرنہٕ، ییٚلہِ زَن راتھ رٲژ ہُنٛد درجہٕ حرارت منفی 0.3 ڈگری سیلسیس اوس۔