پلوٲمِس منٛز منشیات فروش گِرِفتار، چرٕس ہیوٗ مادٕ برآمد: پُلیٖس

سماجَس منٛز نشاور ادوِیات ختم کرنٕچ جٲری مُہمہِ دوران کوٚر پلوامہ پولیسَن اکھ ڈرگ ڈِیلر گِرِفتار تہٕ أمِس نِش کوٚرُکھ چرٕس ہیوٗ ممنوعہ مادٕ ضبط۔
پُلسہٕ ترجمانَن ووٚن زِ پلوامہ پُلسہٕ تھانٕکۍ أکۍ ٹیٖمَن رُکوو کوئل پلوامہ کِس أکِس چوکہِ پٮ۪ٹھ اکھ شخٕص۔
تِمَو ووٚن زِ تلٲشی دوران آو أمِس نِش 1.190 کِلوگرام چرٕس ہیوٗ ممنوعہ مادٕ برآمد کرنہٕ۔
مُلزِم سٕنٛز شناخت چھِ لجورا پلوامہ کِس روزَن وٲلِس محمد صبر رادر سُنٛد نیٚچُو طارق احمد رادر ناوٕ سۭتۍ کرنہٕ آمٕژ۔
پُلسہٕ ترجمانَن ووٚن زِ اَتھ سلسلَس منٛز چھُ پلوامہ پُلسہٕ تھانس منٛز ایف آئی آر نمبر 279/2025 تحت این ڈی پی ایس ایکٹ کِس مُتعلقہٕ دفعَن تحت اکھ مقدمہ درٕج کرنہٕ آمُت، تہٕ مٔزیٖد تفتیش چھےٚ شُروٗع کرنہٕ آمٕژ۔
تِمَو ووٚن زِ پلوامہ پولیس چھُ منشیات ختم کرنہٕ خٲطرٕ پرعزم ۔