سرینگرَس منٛز ڈرگ ڈیلرَس خٕلاف بٔڈ کارروائی، اکہِ کرورٕچ جایداد ضبط۔

منشیاتَن خٕلاف مُسلسل تہٕ فٲصلہٕ کُن مُہِمہِ منٛز چھُ جموں و کشمیر پولیسَن سرینگرَس منٛز أکِس بدنام ڈرگ ڈیلر سٕنٛز أکہِ کرورٕچ جایداد ضبط کٔرمٕژ۔
پولیسَن ووٚن زِ ضبط کرنہٕ آمٕژ جائیداد چھےٚ وانت پورہ عیدگاہ، سری نگرٕکِس روزَن وٲلِس بلال احمد ڈار سٕنٛدِس نیٚچوِس باسط بلال ڈار سٕنٛز یُس منشیاتٕچ اسمگلِنگ کٮ۪ن واریاہَن معاملَن منٛز شٲمِل چھُ۔ این ڈی پی ایس ایکٹ کِس دفعہٕ 8/21 تحت چھُ مُلزِمس خٕلاف نوہٹہ پُلسہٕ تھانس منٛز ایف آئی آر نمبر 59/2024 درٕج کرنہٕ آمُت، ییٚلہِ زَن این ڈی پی ایس ایکٹ کِس دفعہٕ 8/22-29 تحت ایف آئی آر نمبر 114/2025 چھُ تہٕ صفاکدل پُلسہٕ تھانس منٛز چُھ تفتیش جٲری۔
پُلسہٕ مُطٲبِق گوٚو تٔحقیٖقاتَس دوران یہِ ظٲہِر زِ زیر بحث رہٲیشی جایداد چھےٚ غٲر قونوٗنی منشیاتٕچ کاربار سۭتۍ حٲصِل کٔرنہٕ آمٕژ۔ اَتھ بُنیادَس پٮ۪ٹھ آیہِ این ڈی پی ایس ایکٹ کِس دفعہٕ 68-F تحت جایداد ضبط کرنہٕ خٲطرٕ قونوٗنی کاروٲیی کرنہٕ۔ یہِ ضبطی ہٕنٛز کاروٲیی آے تمام قونوٗنی طٔریٖقہٕ کار مُطٲبِق دۄن آزاد گواہَن ہِنٛزِ موجودگی منٛز کرنہٕ۔