بارہمولہ پولیسَن کوٚر دھوکہ دہی تہٕ ڈاکہٕ ریکیٹ بے نقاب، 600,000 رۄپیہِ نقٕد تہٕ نقلی سۄنہٕ رۅپیہِ ضبط۔۔
اکہِ بجہِ کارروٲیی منٛز کٔر بارہمولہ پولیسَن دھوکہ دہی تہٕ ڈاکس منٛز شٲمِل اکھ منظم جماعت بے نقاب ، یِمَن نِش آو600,000 رۄپیہِ نقٕد تہٕ 17 نقلی سۄنہٕ رۅپیہِ برآمد کرنہٕ، ییٚلہِ زِ جُرمَس منٛز استعمال گژھَن واجنہِ گاڑِ تہِ ضبط آیہِ کرنہٕ۔
پُلسہٕ مُطٲبِق ٲس 18 دسمبر 2025 پٹن پُلسہٕ تھانس منٛز پلوامہ کِس روزَن وٲلِس فرقان اکبرَن تحریری شِکایت درٕج کٔرمٕژ۔ تٔمۍ ووٚن زِ سُہ گوٚو پننِس سٲتھی سلیمان بٹس سۭتۍ رٔلِتھ سۄنہٕ بسکٹ ہیٚنہٕ کہِ بہانہٕ دھوکہ دہی تہٕ ڈاکُک شکار۔ شِکایتَس مُطٲبِق میوٗل شَک آوَر افرادَن گۄڈٕ گۄڈٕ 100,000 رۄپیہِ پیشگی تہٕ پتہٕ وونُکھ تِمَن سۄنہٕ واتناونہٕ باپتھ زنگم کراسنگ پٮ۪ٹھ۔
وۅنۍ گوٚو مُقرر جایہِ پٮ۪ٹھ نِی شَک آوَر افرادَو زَبردٔستی باقٕے پوٚنٛسہٕ، شِکایت کَرن والٮ۪ن دِژٕکھ دھمکی تہٕ ژٔلِکھ واقعہٕ جایہِ پٮ۪ٹھٕ۔
واقعہٕ کِس بُنیادَس پٮ۪ٹھ آیہِ پٹن پُلسہٕ تھانس منٛز ایف آئی آر نمبر 241/2025 تحت مُتعلقہٕ دفعَن تحت ایف آئی آر درٕج کرنہٕ۔