بارہمولہ کِس پٹن علاقَس منٛز شَکاوَر چیٖز برآمد ، پتہٕ آو بے اثر کرنہٕ۔
شُمٲلی کشمیر کِس بارہمولہ ضِلعہٕ کِس تاپر پٹن علاقَس منٛز کٔر سیکورٹی فورسَن بۄموارِ دۄہ صُبحٲے سری نگر-بارامولا قومی شاہراہَس پٮ۪ٹھ اکھ مشکوک چیٖز، مُمکِن طور اکھ آے ای ڈی برآمد تہٕ کوٚرُکھ یہِ کانٛہہ نۄقصان واتناونہٕ ورٲے بے اثر ۔
حکامَو ووٚن زِ بۄموارِ دۄہ صُبحٲے معموٗل چہِ چیکنگ دوران وُچھ سیکورٹی فورسَن تاپر پٹن علاقَس منٛز سڑکہِ پٮ۪ٹھ اکھ شَکاوَر چیٖز۔
تِمَو ووٚن زِ یہِ وُچِھتھ وٲتۍ پولیس تہٕ باقٕے سیکورٹی ایجنسی موقعہٕ جایہِ تہٕ عوامٕچ حفاظت یقینی بناونہٕ خٲطرٕ کوٚرُکھ علاقہٕ بنٛد ۔
تِمَو ووٚن ووٚن زِ اَمہِ پتہٕ آو بم ناکارٕ بناونٕچ ٹیم بُلاونہٕ، یٔمۍ کانٛہہ نۄقصان واتناونہٕ ورٲے چیٖز بے اثر کوٚر۔
حکامَو ووٚن بیٚیہِ زِ یہِ علاقہٕ آو پتہٕ محفوٗظ قرار دِنہٕ، تہٕ لوٗکَن آو پنٕنۍ معموٗل سرگرمی جٲری تھاونُک اِجازت دِنہٕ۔